Şirnex de seba ke bieşkê hîna zaf xoza talan bikerê, tayê kesî mîyanê hewldayîşê awankerişê tesîsê dînamîtan de yê. Ajansê ma xo resna belgeyanê muracatê akerdişê tesîsê dînamîtan.
Şirnex de bi desan serrî yo xoza yena talankerdene. Serranê peyênan de no talan êdî bi makîneyanê kar û teqnayîşê dînamîtan yeno kerdene. Goreyê agahî û belgeyanê ke ajansê ma girewtê, kesê bi nameyê M.K seba hacetanê ke viraştişê dînamîtan de yenê şuxulnayene, muracatê sazgehanê dewlete dayo ke ey rê destûr bêro dayene.
Seba akerdişê tesîsê dînamîtan muracatê Walîtîya Şirnexî kerdo
Goreyê agahîyanê çimeyan ke dayê ajansê ma; kesê bi nameyê M.K seba destûrê bedilnayîşê îmarê Herêma Bestaya Sûr a şaristanokê Dêrgule yê Şirnexî muracatê Walîtîyê Şirnexî kerdo û seba bedilîyayîşê planê îmarî bibo, Walîtîyê Şirnexî seba qebulkerdişê nê waştişî babete erşawita Meclîsê Pêroyî yê Şaristanî. Meclîsê Pêroyî yê Şaristanî do kombîyayîşanê aşma teşrîna verêne de nê rojevî bierjno û ney ser o qerar bido.
Destûr çin o la dest bi viraştişê tesîsê dînamîtan kerdo
Reyna goreyê agahîyanê ke ameyê girewtene, kesê bi nameyê M.K tayê kesan ra vato, “Eke Meclîsê Pêroyî yê Şaristanî waştişê mi qebul nêkero, mi seba bedilnayîşê îmarî karê xo Anqara de hel kerdo.” Rixmo ke destûr nêameyo dayene zî yenı vatene ke M.K seba awnakerdişê tesîsî dest bi amadekarîyan kerdo û Dêrgulê ra berdo mîyanê 23 donim erdo ke do tesîs tede bêro awankerdene.
Tesîsê dînamîtan do bêro linganê talankeran ver
Bi viraştişê tesîsê dînamîtan amancê kesê bi nameyê M.K o yo ke bazirganî bikero û ney ra girêdaye do xozaya Botanî bi dînamîtan hîna zaf bêra talankerdene. Demo ke no tesîs bêro awankerdene wayîrê kananê komirî û cigêrayîşê petrolî reyde do bieşkê her dem. Xo biresnê hacetanê dînamîtan. No zî do bibo sebeb ke herimnayîşê koyanê Botanî do hîna zaf bibo.
