Maruf Kartal ke bi rayîrê KHK’yî kar ra ameyo dûrvistene, dîyar kerd ke roja ke dest bi kar kerdo, a roje ra heta roja ke ameyo îxrackerdene, seba şarî xover dayo û vat: “Azadîya şarî azadîya ma ya.”
Platformê Konfederasyonê Sendîkaya Karkeranê Raya Pêroyî (KESK) seba kesanê ke bi rayîrê KHK’yî kar ra ameyê dûrvistene, Amed ra heta Anqara bi sloganê “Ma do karê xo apey bigîrê” dest bi rayîrşîyayîşî kerd. Rayîrşîyayîşo ke 13ê teşrîna verêne de dest pêkerd, do Semsûr, Dîlok, Edene, Mersîn û heta Anqara dewam bikero.
Maruf Kartalo 58 serre serra 1991 de Bêdlîs de dest bi kar kerdo û 24 serrî bêmabên qada weşîye de xebitîyayo. 29ê êlula 2015î de bi KHK’yî karê xo ra ameyo dûrvistene. 10 serrî yo seba agêrayîşî xover dano. 2018î de seba têkoşînê xo ameyo girewtene û 2 serrî girewte bîyo. Nika vera bêhuqûqîye Amed ra ver bi Anqara embazanê xo reyde rayra şono. Maruf Kartal derheqê serebûtanê xo de Ajansê ma rê qisey kerd.
‘Verê zî ewro zî vera bêhuqûqîye xover dana’
Maruf Kartalî dîyar kerd ke heta roja ke ameyo îxrackerdene 24 serrî yo bêmabên xebitîyayo û vat: “Şewa 29ê êlula 2015î de ez karî eşt a. Merdim mîyanê keye û embazanê xo de kêm maneno. Mi ra zaf çîyî ameyê vatene. Mi verê zî vera bêhuqûqîye xover da, ewro zî ez reyna xover dana. Demo ke ez karî ra ameya eştene, ez keyeyê xo de nêronişta. Mi bêhuqûqîye qebul nêkerde. Mi mîyanê HDP’yî de wezîfe girewt. Dima 2018î de ameya girewtene. Ez di serrî hepisxane de menda. Dima ke ez ameyê veradayene, mi reyna partî de wezîde girewt.”
Maruf Kartalî dîyar kerd ke demo ke o karî ra ameyo dûrvistene, xeylê zehmetî antê û ekonomîyê înan zaf qels mendo û wina vat: “Heta ke azadîya pêroyê şarê ma nêra ca, ma agêrê karê xo ser o zî ma azad nîyê. Eke ez mird biba û cîranê mi vêşan bibê nêbeno. Eke ez agêra karê xo û mirdî biba la welatê mi azad nêbo, ez nê çîyî qebul nêkera. Ez bêhuqûqîye qebul nêkena. Ez sereyê xo nêtewnena. Ma nêbenê hemkarê zilmî. Heta peynî ma do vera bêhuhûqîye. Heta ke şarê ma azad nêbo, ma rê azadîye çin a. Ma azadîya welatê xo nêyerê ca, ma nêagêrenê karê xo ser o.”
