Seba 15ê Gulane Roşanê Zonê Kurdî, Gola Çetû de domanî ameyî pêser û înan zengînîya zonê xo yê dayîke bi huner û kayan fîraz kerd. Aktîvîteya ke hetê Atolyeya Domanan a ‘Zarok Ma’ û temsîlîyetê KESK’î ra ameye organîzekerdene de.
Platformê Şubeyanê Dêrsimî yê Konfederasyonê Sendîkayanê Xebatkaranê Pêroyî (KESK), seba 15ê Gulane Roşanê Zonê Kurdî, Gola Çetû de aktîvîteyêke viraşte. Domananê Dêrsimî Atolyeya Geroke de resmî viraştî, kay kerd û kilamî vatî. Atolyeya Geroke ra Şêrko Kanîwarî seba na roje ma rê qisey kerd.
‘Domanê Dêrsimî zonê xo nêzanenê’
Şêrko Kanîwarî qisey kerd û wina va: “Roşanê zonê Kurdî pîroz bo. Seba naye ra ma ameyî Dêrsim. Qomî bi zonê xo yenê naskerdene. Statûyê ma çin o. Welatê ma bindest o. Ma gerek her roj wayîrê zonê xo vejîyê. Ma ewro îtîya de çi dî? Domanê Dêrsimî Kirmanckî û Kurmancî nêzanenê. No hem trajedîyo û hem zulm o, hem zî resmo bê statû yo. Gerek Tirkîya de, Vakûrê Kurdîstanî de zonê dayîke bibo wayîrê yew statû. Wa domanê ma kulturê xo bizanê.”
