Şaredarîya Amedî ya Şaristanê Girdî 9 serrî ra pey Konservatuarê Aram Tîgranî reyna akena. Xebatkarê Konservatuarî Ferhat Ertaş dîyar kerd ke wayîrvejîyayîşê Konservatuarê Aram Tîgranî, wayîrvejîyayîşê nasnameyê Kurdkî yo.
Dayîreyê Kultur û Karûbaranê Sosyalî yê Şaredarîya Amedî yê Şaristanê Girdî bi sloganê “Şima bê allternatîf nîyê” dest bi amadekarîya Konservatıarê Aram Tîgranî kerd. Konservatuar serra 2010î de amebi akerdene. La dima ke qeyûm ame tayînkerdiş, qeyûm 2016î de berê ey girewtbî. Şaredarîya Amedî ya Şaristanê Girdî dima ke kewt destê DEM Partî, 9 serrî ra pey reyna konservatuarî akena. Konservatuarî de do perwerdeyê tîyatro, muzîk, muzîkê gedeyan, edebîyat, resîm û sînemayî bêrê dayene. Do perwerde bi ziwanê Kurdkî bêrê dayene. Goreyê dersan do wendekarê 7 serrî ra heta 32 serrî beşdarê dersan bibê. Do goreyê dersan emir bêro bedilyayene.
Xebatkarê Konservatuarî Ferhat Ertaş derheqê xebatanê konservatuarî de dîyar kerd ke seba şaristananê cîya muracatî est ê û do heta 20 rojan dewam bikerê. Ferhat Ertaş îfade kerd ke înan plan kerdbi ke muracatî 12ê teşrîna verêne de biqedîyê û vat: “La ma muracatî seba kesanê teberê şaristnaî 20 rojêna derg kerdê. Ma kesanê ke wazenê hunerê Kurdkî rê bibê cewab qade akerde.”
‘Bi destesernayîşê îradeyê şarî konservatuar zî ame girewtene’
Ferhat Ertaşî îfade kerd ke Konservatuarê Aram Tîgranî 15 serrî ra ver Amed de amebi akerdene û sserra 2016î de dimayê qeyûmî ame girewtene û wina vat: “Konservatuarê Aram tîgranî beşê muzîkî de sey nasname vejîya orte. Amed de Konservatûarê Aram Tîgranî û Wan de zî Konservatuarê Nûda est bi. Binê Şaredarîya Peyasî de zî Konservatuarê Cegerxwînî est bi. Uca de xebatê hunerî ameyêne kerdene. Wexto ke qeyûmî dest da îradeyê şarî ser o, konservatuarî ameyê girewtene. Qada yewin ke ameye girewtene, qada kulturî bîye.”
‘Bi veng û renganê xwe yê cîya şaristananê xo bixemilnê’
Ferhat Ertaş dîyar kerd ke ê do reyna Konservatuarê Aram Tîgranî bi sloganê “Şima bê alternatîf nîyê” akerê û vat: “Akerdişê nê konservatuarî reyde ma tayê beşê bînî tede vêşî kerdê. Ma hewl danê ke binê banê Konservatuarê Aram Tîgranî de beşanê edebîyat, tîyatro, resiim, muzîk û sînemayî vêş bikerê. Beşê muzîkî de gedeyî ke emrê înan 6-12 serrî bo do ders bivînê û do akademîya gedeyan bêra awanerkerdene. Nê ra teber kesê ke emrê înan 17-25 o, ê zî do est bî. Eynê wextî de desa tîyatro seba kesanê ke emrê înan 17-25 o, seba înan zî est bo. Yê sînema zî eyn emr o. Ma na reye beşê anîmasyonî zî tede vêşî kerde. Beşê anîmasyonî de 2D û 3D est o. Ma do perwerdeyîya înan zî bidê. Ma seba 6 beşan muracatî akerdê. Ma hewl danê ciwanê kurdî bi veng û renganê xo yê cîya şaristananê xo bixemilnê.”
‘Ganî polîtîkayê kultur û ziwanî vejîyê vernî’
Ferhat Ertaş dewamê qiseykerdişê xo de dîyar kerd ke heta nika xeylê şaristanan ra muracatî ameyê kerdene û wina domna: “Ma sey xebatkaranê na qade vejîyê şaristananê cîya û wendekaran bigêrê. Ma seba şaristananê cîya dest bi muracatan kerd. Nika hûmara înan resaya 10-15 kesan. Ma do hewl bidê seba heme lehçeyanê ziwanê Kurdkî zî perwerde bidê. Nika tena kurmanckî û kirmanckî est ê. Emir seba ma muhîm nîyo, ma averşîyayîşî ra ewnîyenê. Do seba edebîyato klasîk ê dinya zî dersî bêre dayene. La ma do hîna zaf edebîyatê Kurdkî ser o vinderê. Gedeyê ke hetê nasname û ziwanê xo ra aver şêrê ê gamêk vernî de yê. Eynê wextî de dewlet bi polîtîkayanê xo yê lêminan hewl dana ke gede û ciwanê kurdî ziwanê xo ra şerm bikerê.Ganî ziwan zî sey gulêk bêro pawitene ke geş bibo. Demo ke merdim polîtîkayanê serranê 80-90î ra nêvejîyo, merdim çinbîyayîşî reyde rî bi rî maneno. Konservatuar û sazgehî vera nê mertal ê.”
‘Huner nêvindeno, her tim herikîyeno’
Ferhat Ertaşî peynîya qiseykerdişê xo de da zanayene ke nika no konservatuar tena Amed de est o û vat: “Demo ke kesê ke şaristananê ciya ra muracat bikerê zî ma do hetkarîya cayê mendişî û debarî bidê înan. 2016î ra pey ke qeyûm ame tayînkerdene, reyna ma xebatê hunerî domnayê. Zaf reyî demê qeyûmî de çalakîyê ma yê hunerî ameyê qedexekerdene. Seba deyîranê Kurdkî ciwanê kurdî ameyê kiştene. Vera nê têkoşînêk est o.”
