Nuştox Îlhan Dayan ke nawitgehê kitaban de qisey kerd û va ke her merdim ke vano: “Ez kurd a” vera ziwanî de wezîfeyanê ci yê exleqî, sîyasî û wijdanî est ê û wina va: “Wa her keyeyêk seba kultur û ziwanê kurdkî sey dibistanêke bibo. Rewşa ziwanî te de ya, seba ma rexnedayîşî yo.”
Nawitgehê Kitaban ê Amedî ke bi hembarîya YEW-KURD, Şaredarîya Şaristanê Girdî ya Amedî, DTSO û TUYAP’î 18ê Citmenge de dest pêkerd, fûar roja şeşine de domyeno. Nawitgeho ke 32 weşanxaneyê kurd, sazîyê ziwanî, kulturê kurdî û xeylê nuştoxanê kurdî zî ca gênê do hetanî 26ê Citmenge bidomyo.
Yew nuştoxo ke nawitgeh de kitabanê xo îmze keno Îlhan Dayan o. Îlhan Dayan dima 32 serran 26ê Adare de Hepisxaneyê Hûmara Tîpa T a Amedî ra ame veradayene. Îlhan Dayan zî sey xeylê hepsê sîyasî yê kurdî dest bi nuştoxî keno. Îlhan Dayan hetanî nika hîrê kitabanê şîîrane yê bi nameyê “Bêrîjan” , “Xeyalbêj” û “Diyariyên Şevê” nuşto. Îlhan Dayan ajansê ma rê qisey kerd.
‘Ziwan nasnameyêko neteweyî yo’
Nuştox Îlhan Dayan bal ant ser avzelîya ziwanê kurdkî û wina va: “Kitabanê mi hetanî nika di rayan ameyê çapkerdene û nika hadreyîyê mi yê edebîyatê kurdkî û ziwanî ser dewam kenî. Rewşa ziwanê kurdkî daraxo xetere de yo. Warê sîyasî, komelî û heme waranê cuyeye de ziwan ver bi qedînayîşî ra şono. Têkoşînê ziwan ê gird û giran domyeno la rewşa ziwanî te de seba ma rexnedayîşî de yo. Her merdimêko vano ez kurd a, verba nê ziwanê şîrîn û weş de wezîfeyanê ci yê exlaqî, sîyasî û wijdanî est ê. Ziwanê çikêko ne rêzî nîyo.”
Îlhan Dayan eşkera kerd ke ziwan nasnameyê neteweyêke yo û wina domna: “Mîyanê ziwanî de hîs, raman est o û tarîxê ci zî xeylê nimite yo. Bi ziwanêko bîn ra ne reheto ke merdim nê hîs û ramanî biciwo. Seba ci zî sey ke Rayberê Şarê Kurdî Abdullah Ocalan vano: ‘Ziwan beden o, beno ke merdim bedenê xo ra wayîr bivejo.’ la çi heyf ke beşdarî nê heqîqetî rewşa ke ma te de yê nîy. War, kolan û keyeyî de domananê ma êdî ziwanê xo qisey nêkenî, dayîkanê ma zî bi ziwanê xo qisey nêkenê.”
