Heyetê Îmraliyî eşkera kerd ke Rayberê Şarê Kurd Abdullah Ocalan pêvînayîşî de vat: “Seba ka ma bieşkê vîyarê merheleya pozîtîfe bibê, lazim o her kes nê prosesî de hesas, cidî û bi berpirsîyarî têbigêro.”
Endamê Heyetê Îmraliyî yê Partîya Têduştî û Demokrasîyî ya Şaran (DEM Partî) Pervîn Buldan, Mîthat Sancar û avûkatanê Buroyê Huqûqî yê Seserre Faîk Ozgur Erol, vizêr Rayberê Şarê Kurdî Abdullah Ocalan reyde pêvînayîş kerd. Heyet derheqê pêvînayîşî de eşkerayîyêka nuştekî daye.
Eşkerayî de wina ame vatene: “3ê Teşrîna Peyêne ya 2025î de ma birêz Abdullah Ocalan reyde pêvînayîş kerd. Pêvînayîş nêzdîyê hîrê saete dewam kerd û xeylê pozîtîf bi. Weşîya ey baş bîye. Pêvînayîşî de bi kilmkî nê erjnayîşî kerdê:
‘Seba proseso ke ma tede yê, bieşko aver şêro, hewce keno ke tarîx û sosyolojî hîna zaf cidî bêrê erjnayene. Tesbîtê, têkilîya tirk û kurdan hezar serrî yo sey stûnan xo resnayo roja me, muhîm o. Seba vînayîşê nê stûnan, fehkerdiş û temîrkerdişê înan, lazim o bi xurtkerdişê hemraybîyayîşî est o.
Bi xêzkerdişê xetan nê, lazim o ma asoyêko ke problemanê roja ma zî xo de hewîneno, awan bikerê û wina têbigeyrê.
Rixmê şertanê bisînor zî ma seba meseleyêka tarîxî mîyanê hewldayîşan de yê. Ma hewl danê ke merheleyêka rijnayox û nêgatîf nê la merheleyêka pozîtîfe aver berê. Lazim o dîyardeya kurd her hetî ra daxilê qanûnîbîyayîşê komare bêro kerdene û seba ney zî prosesêkê vîyartişî esas bêro girewtene. Bi hewayêko pêroyî vîyartişê qanûnîbîyayîşî do hîmanê huqûqî yê Komara Demokratîke zî bihêz bikero.
Îmkanê entegrasyono demokratîk ê hetê serdemî ra ma nêzdîyê ey ê, hem herêmî hem zî unîversal o. Seba ke ma vîyarê merheleya pozîtîfe, lazim o her kes nê prosesî de hesas, cidî û bi berpirsîyarî têbigeyro.'”
