Platformê Şîyar Be û Platformê Sazgehanê Demokratîk ê Amedî derheqê kerdişanê fihuş û tîryakî vernîya Kafeya Roj Demî de eşkerayî daye. Hemverfeka Platformê Şîyar Be Gulşen Demîr dîyar ked ke dewlete polîtîkayanê şerê taybetî ramnena û vat: “Ma do her qade de vera fihuş û tîryakî xover bidê.”
JINNEWS’î 2ê teşrîna peyêne de eşkera kerd ke Kafeya “Roj Dem” a semtê Ofîsî yê Amed de kerdişê fihuş û tîryakî yenê kerdene. Reyna xebere de amebi vatene ke ciwanî daxilê karanê tîryak û fihuşî yenê kerdene. Platformê Têkoşînê Vera Tîryakî ya Şîyar Be û Platformê Sazgehanê Demokratîk vera nê kerdişan bi sloganê “Ma şaristanê xo pawenê, ma destûre nêdanê tîryak û fihuşî” vernîya Kafeya Roj Demî de eşkerayî daye. Hemserekê DEM Partî û DBP’yî yê Amedî, rayberê sazgehanê sîvîl, endamê Platformê Şîyar Be û xeylê kesî beşdarê eşkerayî bîyê. Eşkerayî hetê Hemverfeka Platformê Şîyar Be Gulşen Demîr ra ameye wendene.
‘Dewlete polîtîkayanê şerê taybetî ramnena’
Gulşen Demîr dîyar kerd ke kerdişê fihuş û tîryakî eynê wextî de hêrişê vera komelê polîtîk û exlaqî yê û wina vat: “Ewro fihuş û tîryak bi destê dewlete yenê kerdene û kenê mîyanê komelî. Dewlete polîtîkayanê şerê taybetî ramnena. Bi fihuş û tîryakî wazenê ciwan û komelî estbîyayîşê xo ra dûrî bifînê. Wazenê ciwan û komel bêpawitiş bimanê. Ma azadîya ciwanan û hêzê ciwanan pawenê. Ma do her qade de vera tîryak û fihuşî xover bidê. Ma do komelo demokratîk û exlaqî û azadîya komelî bîyarê ca. Ma do destûre nêdê ke kulturê komelî biherimîyo. Do hêzê komelî yê xopawitişî nê hêrişan pûç bikero. Komel erjanê komelî ser o şên beno. Ma zanê xeylê kafeyî sey materyalê şerê taybet yenê şuxulnayene. Ma sey Platformê Şîyar Be vanê, şarê ma tena nîyo.”
