Hat angaştkirin ku li bajarê Alîgûdarzê yê eyaleta Lûristanê ya Îranê ciwanê bi navê Omîd Sarlak ê 27 salî, ji aliyê pasdarên Îranê ve hatiye kuştin.
Ciwanê bi navê Omîd Sarlak (27) ku ji bajarê Alîgûdarzê yê eyaleta Lûrsitanê ya Îranê ye, ji ber ku wêneyê Serokê Rejîma Îslamî ya Îranê Alî Hamaney şewitandiye hat îdîakirin ku ji aliyê pasdaran ve hat kuştin. Bûyer di 1ê mijdara 2025an de qewimiye. Li gorî çavkaniyan Omîd Sarlak ji ber parvekirina xwe ji aliyê Pasdarên Şeroşê ve hatiye binçavkirin û piştre 1ê mijdarê roja şemiyê di wesayîta xwe de mirî hatiye dîtin. Hat hînbûn ku Omîd Sarlak, li ser malperên xwe yên medyaya dîjîtal dîmenekî ku wêneyê Alî Hamaney dişewitîne û axaftineke Mûhamed Riza Şah Pehlewî danaye ser dîmen, parve dike. Li gorî çavkaniyên herêmî çend saet beriya mirinê Sarlak ji aliyê pasdaran ve hatiye binçavkirin û dû re jî mirî hatiye dîtin. Sarlak, li bajarê Alîgûdarzê hatiye definkirin.
Raya giştî ya Îranê li ser medyaya dîjîtal bertek nîşanî kuştina Sarlak da û li ser vê yekê hikûmetê daxuyaniyek parvekir û angaştkir ku wan Omîd Sarlak nekuştiye. Dayik û bavê Omîd Sarlak jî bertek nîşanî kuştina lawê xwe dane û dane zanîn ku ew dê şopdarê lêpirsînê bin. Her wiha Wezareta Kar û Barên Derve ya Amerîkayê jî kuştina Omîd Sarlak şermezar kir û weke mirineke trajîk pênase kir.
Li ser vê yekê komeke aktivîstên siyasî bi taga #I_am_Omid_Sarlak_too kampanyaya şewitandina wêneyên Hamaney dan destpêkirin û vê kampanyayê di nava civakê de piştgiriyeke mezin dît.
