TJA’yî bi hemkarîya Şaredarîya Sûrî derheqê 25ê Teşrîna Peyêne Roja Têkoşînê Vera Şîdetê Cinîyan qezaya Sûrî de têhetameyîş organîze kerd û problemê cinîyan goşdarî kerdê.
Têgêrayîşê Cinîyanê Azad (TJA) û Şaredarîya Sûrî bi munasebetê 25ê Teşrîna Peyêne Roja Têkoşînê Vera Şîdetê Cinîyan qezaya Sûrî de cinîyanê taxe reyde ameyê têhet. Têhetameyîşî de Hemşaredara Sûrî Fatma Gulan Onkol, aktîvîsta TJA’yî Hulya Alokmen û xeylê cinîyê Sûrî beşdarê kombîyayîşî bîyê.
Têhetameyîşî de aktîvîsta TJA’yî Hulya Alokmen derheqê şîdetê vera cinîyan, problemê ke cinî kuçe û taxan de rî bi rî manenê, qisey kerd û wina vat: “Demo ke mesela bena heqê cinîyan kes vengê xo nêkeno. Cinîyê kurdî her tim têkoşînê xo bingeyê azadîye ser o rayra berd. Verê cinîyêk rê şîdet biameyêne kerdene û problemê cinîyan est bîyêne, cinîyê taxe heme pîya piştgirîya yewbînan kerdêne. La nika no kêm bîyo. Ewro çîyê ke ma taxe û kuçeyanê xo de nêwazenê, ganî ma hemverê înan de vinderê. Ma wayîrê taxe û kuçeyanê xo vejîyê. Amancê têhetameyîşê ma yê ewroyî zî o yo ke ganî cinî nê esasî ser o se bikerê. Ma prosesêko muhîm ra vîyarenê. Lazim o şarê kurd xo seba komelê demokratîkî bi rêxistin bikero. Ma sey cinî kuçeyanê xo de û taxanê xo de wazenê azade biciwîyê.”
Qiseykerdişê Hulya Alokmenî ra pey cinîyanê taxe qisey kerd û problemê ke ciwîyenê, îfade kerdê.
