Roniştişo çarin ê dewaya rojnameger Rahîme Karvar ewro ame kerdene û aye roniştişî de paiwitişê xo kerd û vat: “Çalakîyê ke dosya de sey suc ameyê mojnayene, karê rojnamegerî yê, ez beratê xo wazena.”
Roniştişo çarin ê dewaya rojnameger Rahîme Karvar ke bi îdiaya “endamtîya rêxistine” yena muhakemekerdene, ewro Mehkemaya Cezayanê Giran ê Stenbolî ya 4. de ame kerdene. Rojnameger Rahîme Karvar û avûkata aye Elîd Taşdogen beşdarê roniştişî bîyê. Avûkata Rahîme Karvar Elîd Taşdogen dîyar kerd ke muwekîla aye rojnameger û çalakîkera femînîst a û vat: “Muwekîla mi tena moderatorîya programî ke îdianame de behsê ci yeno kerdene, kerda û nêeşkena riyê qiseykerdişanê beşdaranê programî ra berpirsîyar bêra vînayene. Şuxulnayîşê çekuya “Kurdîstan” zî sey suc nêeşkeno bêro hesibnayene.”
‘Ez do karê rojnamegerî bidomna’
Rahîme Karvar zî pawitişê xo kerd û vat: “Kerdişê mi ke sey suc yenê mojnayene, çalakîyê rojnamegerîye yê. Qerar çi beno wa bibo, ez do karê rojnamegerîye bidomna. Ez beratê xo wazena.”
Mehkema bi îdiaya ke “hetkarîya rexistine kerda” serrêk û 13 aşmî cezaya hepsî daye Rahîme Karvar. Mehkema qerar da ke qedexeyê vejîyayîşê teberê welatî dewam keno. La qedexeyo ke vejîya teberê şaristanî û aşme de 2 reyî îmza bida qereqolî, hewana.
