Keyeyê Bakîoglu ke Farqîn de ciwîyeno, hîrê gedeyê înan astengdar ê û Qeymeqamîya Farqînî bi baxaneyê “fikro sîyasî” hetkarîya heme hîrê ferdanê astengdar ê keyeyî birnaya. Medenî Bakîoglu vat: “Seba fikrê ma yo sîyasî meaşî gedeyan birna.”
Dewa Huseyna ya qezaya Farqînî ya Amedî de di way û birayêkê astengdarî est ê. Gedeyê keyeyê Bakîoglu yê. Dîlan Bakîoglu 27 serrî ya, Dîyar Bakîoglu 25 serrî yo û ya tewr şenike zî Umrana 18 serrî ya. Dîlan de nêweşîya epîlepsî est a, Dîyar de zî nêweşîya şant (hîdrosefalî) yanî mezgê ey ser o awe kom bîya û o nêeşkeno wirzo, her tim erd de yo. Umran zî cîke maya xo ra bîya nêweş a. Rixmo ke heme hîrê ferdê keyeyî astengdar ê zî Weqfa Piştgirîye û Hetkarîye ya Komelkî ke girêdayeyê Qeymaqamîya Farqînî ya, hetkarîya madî ya seba keyeyî birnaya. Sewbîna weqfa ke nameyê aye viyareno, sîgortaya seba weşîye ya ferdanê keyeyî zî betal kerda.
Fikrê ey o sîyasî kerdo baxaneyê birnayîşê hetkarî!
May û pîyê gedeyan Saygul û Medenî Bakîoglu bi îmkananê xo yê kêm cehd kenê ke gedeyanê xo ra biewnê û lazimtîyanê înan bîyarê ca. Rixmo ke keyeyî zaf reyî vera birnayîşê meaşê astengdarîye û betalkerdişê sîgortayî muracatê Qeymeqamtîya Farqînî kerdo zî tu encam nêgirewto. Keyeyî da zanayene ke kesê ke derûdorê înan de yê şîyê gerreyê înan kerdo û hetkarî ameya birnayene. Medenî Bakîoglu dîyar kerd ke riyê wezîfeyêkê Hemserekîya Partîya Demokratîk a Şaran (HDP) a Qezaya Farqînî kerda, nê kerdo baxaneyê betalkerdişê sîgorta û birnayîşê meaşanê gedeyanê înan.
Sewbîna sazgehanê wezîfedar zî keye ra vato, “Şima kar û xebatanê rêxistine kenê, ma nêeşkenê seba şima çîyêk bikerê.”
Keye vano ke înan muracatê mehkema zî kerdo la dosya erşawita Mehkemaya Îstînafî ya Anqara. Rixmê ney zî cewabê dosya nêdayo û dosya demêko derg o ke îstînafî de vinderte ya.
Keyeyî da zanayene ke înan çend reyî muracatê Şaredarîya Amedî ya Şaristanê Girdî û ya qezaya Farqînî kerdo zî ka herdi şaredarî zî keye rê nêbîyo cewab. Ewnîyayîşê gedeyan zafane milê maya înan ser o yo. Demo ke pîyê înan keye de bo, ê pîya gedeyan ra ewnîyenê. Sewbîna keyeyî dîyar kerd ke mesrefê tedawîya gedeyanê înan zaf vay ê û ê kerdişê tedawîya gedeyanê xo de zehmetî ancenê.
