Cinîyan derheqê modelê şaristanê cinîyan ke ame îlankerdiş ser o qisey kerdî û vatî no model tena sey wareyêk nîyo, wareyê vurnayîşê komelkî yo ke cinî bi hawayêko têduşt, azad û bi asayîş beşdarê prosesê qerarî benê.
Rojê vîyarte de Partîya Têduştî û Demokrasîyê Şaran (DEM Partî) Amed de kombîyayîşê gird viraşt, qerar girewtî ke şaristanê Amed, Nisêbîn, Gever, Artemêt û Cizîr sey şaristanê cinîyan bêrê awankerdiş. Bi nê qerarî do cuya şaristanî de hewcedarîyê cinîyan esas bêrê girewtiş û semedê ke cinî bi asayîş, bi azadî û ekonomî rehet bibê, barê înan bêro şenikkerdiş.
Cinîyan derheqê modelê şaristanê cinîyan de ercnayîş kerd.
‘Ganî cinî bibê merkezê cuya xo’
Goreyê xebera Jinnewsî Hemşaredara Pirsûsî Ayten Kaya da zanayîş ke şaristanê cinîyan îstîhdamê cinîyan ra bigîrê heta piştîdayîşê huqûqî û xurtkerdiş û rêxistinbîyayîşê heme wareyê cuya xo armanc keno û va: “Armancê şaristanê cinîyan o yo ke îstîhdamê cinîyan bêro viraştiş, rêxistinbîyayîş heme wareyan de û piştîdayîşê huqûqî semedê cinîyan bo. Armanc o yo ke modelêko ke dorê cinîyan de keweno cuye. Ma hêvî kenê ke demêko nêzdî de Pirsûs de zî şaristanê cinîyan bêro awankerdiş. Semedo ke ma vanê ‘cinî cuye ya’. Nê semedî ra ganî cinî bibê merkezê na cuye. Semedê nê çi destê ma bêro ma do bikerê. Ma wazenê cinî problemê îstîhdamî nêciwîyê. Ma wazenê cinî wayîrê qiseyê xo bibê û cinî keye ra vejîyê teber.”
Bi şaristanê cinîyan vurnayîşê komelêko xurt
Hemşaredara Çinarî Semra Akyuz ard ziwan ke polîtîkaya herêmî de derheqê “cinî komelkî de bêrê vînayîş” tena xizmet nîyo, eynî wextî de hacetê vurnayîşê komelkî yo û wina domnaya: “Ma heme cinî semedê vurnayîşê nê şaristanan hewce vînenê. Her kes bingehê polîtîk ê Amedî zano. Hewcedarîya cinîyan bi wareyêk ke eşkenê xo biresnê ci esto. Roja ewroyî de cinî cuya karî de ca nêgîrê, sey CÎO şîrketê girdan de ca nêgîrê, partî, şaredarî û rêveberîya herêmî de bi sînor ca gênê. Semedê nê ma bi îddîayê ke hîn herêmî bibê şaristanê cinîyan nê ard rojeve.”
Modelê şaristanî ke astengîyan wedarneno
Semra Akyuz dewam de wina ard ziwan: “Ma do îdareyê herêmî de hetê cinîyan ra semedê hedefî lez aver şêrê. Kombîyayîşê wina zî semedê nê muhîm ê. Her kombîyayîşêk muhîm o. Mîsal ma vanê ma şinê parkêke, ware çin o ke cinî tutê xo bilewno, no şaristan şaristanê cinîyan nîyo. Sewbîna awanîyêk de cinîyêke astengdare xo biresno heqê xo, ma nêeşkenê derheqê nê de qisey bikerê. Semedo ke ma vernîya nê bigîrê ma do xebatê xo bidomnê.”
‘Semedê şaristanê cinîyan gamêka gird a’
Endama Heyetê Cinîyan ê Merkezî yê Îdareyê Herêmî yê Demokratîkî Zeynep Sîpçîk zî qisey kerd û va hewteyêk verê Amed de semedê şaristanê cinîyan ameyî têhet û ard ziwan ke nê pêvînayîşî semedê cinîyan muhîm ê. Zeynep Sîpçîk wina ard ziwan: “Çîyê ke nê kombîyayîşî de vejîyayî tena îlankerdiş nîyo, semedê şaristanê cinîyan gamêka gird a. Şaristan, qeza û heme wareyê cuye zîhnîyetê camêrdan ser o yenê domnayîş. Demo ke ma vanê şaristanê cinîyan, yeno manaya ke cinî senî ciwîyenê. Ma eşkenê vajê ke şaristanê cinîyan bi dest, ewnîyayîş û fikrê cinîyan yeno awankerdiş. Semedê nê fikirê şaristanê cinîyan gamêka gird a. Awankerdişê şaristanê cinîyan verê zî amebî qiseykerdiş. Nê projeyî hetê TJA’yî ra amebî qiseykerdiş û a roje ra heta nika plansazîyêk ame kerdiş. Ma do semedê projeyî xebata xo bidomnê.”
