Şaredarîya Amedî ya Şaristanê Girdî û Şaredarîya Rêzanî Kitabxaneyê Mestûre Erdelanî akerd û xeylê kesî beşdarê merasîmê akerdişê kitabxaneyî bîyê.
Bi hemkarîya Şaredarîya Amedî ya Şaristanê Girdî û Şaredarîya Rêzanî çarçewaya projeyê “Seba her taxêk kitabxaneyêk” Taxa Şêx Şamîl de Kitabxaneyê Mestûre Erdelanî bi merasîmêk akerd. Hemşaredara Şaredarîya Amedî ya Şaristanî Girdî Serra Bucak, Hemşaredarê Rêzanî Sîraç Çelîk û Leyla Ayaz, rayberê DEM Partî û DBP’yî, temsîlkarê rêxistinanê sîvîl û xeylê welatijî beşdarê merasîmî akerdişê kitabxaneyî bîyê.
Serra Bucak qisey kerd û îfade kerd ke înan heta nika xeylê kitabxaneyî akerdê û reya ewile hende ciwan û wendekarî beşdarê akerdişê kitabxaneyêkî benê û no zî encamê xebatanê seba ciwanan dano mojnayene.
Dima ra zî Hemşaredarê Rêzanî Sîraç Çelîkî qisey kerd û dîyar kerd ke seba şar û ciwanan destê înan ra çi yeno, ê kenê û vat: “Ciwanî ameyoxê ma yê, şima do biwanê, siba zî do şima çîyanê hîna başan bikerê. Nê semedî ra ma wazenê ciwanê ma biwanê, xo bizanê û xo bi rêxistin bikerê.”
Mestûre Erdelan kam a?
Nameyê aye Mah Şeref Xanim a û naznameyê aye Mestûre yo. Derûdorê serra 1804î de şaristanê Sinê yê Rojhelatê Kurdîstanî de ameya dinya. Serdemê Xusrew Xanê Erdelan yo walîyê Sinê de ke bi lekmatyika Nakam ameyo naskerdene, xan û keyeyê Qadirîyan yewbînan ra eciz bîyê, dima ra pêameyê û bîyê merdimê yewbînan. Mestûre bîya cinîya Xusrew Xanê Erdelanî. Xan şîîranê xo de wesfanê Mestûreyî dano. Mestûre zî şîîranê xo de wesfanê Xanî dana. Mestûre hem bi fariskî hem zî bi Kurdkî nuştê û nuştişê şîîran de zî jêhat û zîrek bîya.
Zafaneyê şîîrê aye vîndî bîyê. Tena di hezar beytî mendê ke bi saya Me’rîfetê kulturê Sînê û Mirza Esedulla Xanî Kurdîstanî, qandê 20 serrî ra ver Tehran de ameyê weşanayene.
Mestûre emre xo yê 44 serrî de, serra 1847î de Silêmanî de cuya xo vîndî kerde.
