Konseya Bajêr a Amedê “Meclisa Ciwanan” ragihand. Hevşaredarê Bajarê Mezin a Amedê Dogan Hatûn diyar kir ku dema ciwan pêşengtiya civakê bikin civak jî dê pêş bikevê.
Konseya Bajêr a Amedê li Navenda ÇandAmedê ya navçeya Yenîşehîr a Amedê yekemîn civîna asayî ya “Meclisa Ciwanan” li dar xist. Konseya Bajêr di civînê de biryara ragihandina “Meclisa Ciwanan” girt. Hevşaredarê Bajarê Mezin a Amedê Dogan Hatûn, Hevşaredara Sûrê Gulan Onkol, nûnerên saziyên civakî û gelek ciwan tev li civînê bûn.
Di civînê de ewilî dîwan hat hilbijartin. Gulan Onkol, Sîdar Kiye û Baran Emen ji bo dîwanê hatin hilbijartin.
‘Bibin dengê tevahî ciwanan’
Paşê Alîgirê Sekreterê Konseya Bajêr a Amedê Veysî Kuzu axivî û diyar kir ku bi salane Meclisa Ciwanan ji nûve tê avakirin û got: “Ciwan ji bo înşakirina Amedê amade ne. Em dixwazin ku ciwan bi awayekî azad bifikirin û bibin dengê tevahî ciwanan. Ji bo avakirina jiyanek edalet em bi hêvîne.”
‘Me bi ciwantî dest pê kir em ê bi ciwantî bi serbikevin’
Dûrê Hevşaredarê Bajarê Mezin a Amedê Dogan Hatûn axivî û anî ziman ku nifusa Amedê ji sedî 65 ciwan in û got: “Dema ku Meclisa Ciwanan li Amedê hatibû avakirin gelek xebatên xurt çêdikir. Sîstem dixwaze li gorî xwe bandorê li ciwanan bike. Lê em dibêjin ciwan xwedî vîn in. Dema ku ciwan pêşengtiya civakê bikin civak jî dê pêş bikevê. Dema ziman tune bibe ciwan jî tune dibe. Wekî Rêberê Gelê Kurd Abdullah Ocalan gotibû ‘Me ciwantî dest pê kir em ê ciwantî bi serbikevin.’
Piştî axafinan li ser pirsgirêka ciwan nîqaş hate kirin û hat diyar kirin divê ciwan pêşengtî bike.
Bi avakirina komên xebatan civîn bi dawî bû.
