Aşma teşrîna peyêne de herêmanê de ke binê kontrolê hukmato demkî û Tirkîya de yê, 170 kesî ameyê kiştene. Nînan ra 13ê ci cinî û 21ê ci zî gede yê.
Aşma teşrîna verêne de herêmanê de ke binê kontrolê hukmato demkî yê Sûrîye û Tirkîya de yê, kiştişî dewam kerdî. Sûrîye de bi rojane bi desan hedîseyê kiştişî bi sebebanê teqîyayîşê mayînan, pirodayîşê herêmî û qetilkerdişê kesan ameyê kerdene.
Goreyê ajansê ANHA’yî aşma teşrîna peyêne de cayanê cîya yê Sûrîye de, cinî û gedeyî zî tede 170 kesî ameyê kiştene. Nê hedîseyê şaristananê Hums, Hema, Deraa, Laziqiye, Siwêda, Dêrazorê, Şam û gundewarê wê, Tedmurê û gundewarê Helebî de qewimîyayê.
Nê kesan ra 21ê ci gede yê û riyê mayînanê ke şerî ra mendê, cayanê sey şaristanokê Hama û Îdlîb de cuya xo vîndî kerda. Ê gedeyan ra tayî zî riyê gulebarano rasterast demê pirodayîşê mabênê keyeyan de yan zî encamê şîdeeto çekdarî de şaristananê sey Şam, Hums, Heleb û Îdlîb de ameyê kiştene.
Sewbîna 13 cinî şert û mercanê cîya de ameyê kiştene. Înan ra tayê zî hetê çekdaran ra keye yan zî cayanê bînan de ameyê gulebarankerdene, tayêna zî riyê mayînanê ke şerî ra mendê yan zî encamê şîdetê zereyê keyeyî de cuya xo vîndî kerda.
Ajansî dîyar kerd ke na hûmara merdeyan rewşa têmîyankewta û bêewleyî û seba sîvîlan çinbîyayîşê sîstemêkê pawitişî yê tesîrdar, nê herêman mojnena.
