Senatorê Madrîdî Gorka Elejabarrieta Diazî dîyar kerd ke ê bi hewayêko xurt paştî danê heqê azadîye yê Rayberê Şarê Kurdî Abdullah Ocalanî û wazenê îmkanê ci bêrê caardene ke bieşko bi hewayêko azad rayberîye bikero.
Senatorê Madrîdî yê Welatê Baskî Gorka Elejabarrieta Diazî vat semedê prosesêko hîra yê Kurdîstan de awankerdişê komelê demokratîkî, bi hewayêko huqûqî naskerdişê şarê kurdî şert o.
Senatorê Madrîdî yê Welatê Baskî Gorka Elejabarrieta Diazî Medya Haber TV’yî rê qisey kerd. Dîazî bale ante muhîmîya vengdayîşê Rayberê Şarê Kurdî Abdullah Ocalanî û gamê ke Têgêrayîşê Azadîye yê Kurdîstanî eşt ê ser o û vat: “Penceraya firsetêkê tarîxî ameya akerdene. Seba ke no bêro caardene ganî aktoro sîyasî yo bîn zî gamanê wînayênan bierzo. Ganî bi ronayîşê prosesê bi dîyalogê cîdî, no proses biaçarîyo muzakereyan û bi pêkerdişanê hîrayan bêro netîcekerdene. Tirkîya zî ganî bi perspektîfê çarserîya pêkewtişan nêzdîyê meseleyî biba.
Seba ke no firset biaçarîyo aştîya domdare ganî pêro aktorî tewrê prosesî bibê. Coka ma bawer kenê ke Abdullah Ocalan ganî cade serbest bêro veradayene. Çend rew bibo hende hol o. Bi nê qeydeyî eşkeno tewrê prosesê aştî bibo. Semedê prosesê hîra yê Kurdîstan de afernayîşê komelê demokratîkî, bi hewayêko huqûqî naskerdişê şarê kurdî şert o. Nê reyde ganî ziwan û kulturê şarê kurdî zî bêrê naskerdene.
Şarê kurdî û têgêrayîşê ci hîna hol zanê semedê înan çîyo tewr raşt çî yo. Têgêrayîşo demokratîk ê Bask û şarê Baskî bi hewayêko xurt paştî danê têkoşînê kurdan. Ma bi hewayêko xurt paştî danê heqê azadîye yê Birêz Abdullah Ocalanî û wazenê îmkanê ci bêrê caardene ke bieşko bi hewayêko azad rayberîye bikero.”
