Polîsan serê sibayî eşt ofîsê Buroyê Huqûqî yê Şarî yê Stenbolî ser o. Sereştişî de avûkat Naîm Emînoglu ame destbendkerdene.
Ewro serê sibayî polîsan eşt ofîsê Buroyê Huqûqî yê Şarî yo ke semtê Çaglayanî yê Stenbolî de yo. Sereştişî de avûkatê Komela Huqûqnasanê Hemdem (ÇHD) Naîm Emînoglu ame destbendkerdene. Eynê wextî de Naîm Emînoglû îdarekarê ÇHD’yî zî yo.
ÇHD’yî hesabanê xo yê medyaya dijîtale ser o eşkerayîye daye û wina vat: “Îdarekarê şubeyê ma Av. Naîm Emînoglû, no serê sibayî hetê polîsanê şûbeyê sîyasî ra ofîsê Komela ma de ame destbendkerdene. Her rey sucdarkerdişê neweyî yenê îcatkerdene labelê seba ke Naîmî dewaya Kartalkayayî de, dewaya erdlerzî de, dewaya şorişgeran de avûkatî kerda, yeno hedefgirewtene.”
