Silêman Yildiz o zere Dêrsim de weşîya xo ramneno û bîyo şahidê 94î, behsê waştişanê şarê Dêrsimî keno û wina vano: “Dinya de demokrasî û însanîye est ê, çira no pirodayîş ma de nêqedîyeno.”
No hewte Hewteyê Heqanê Merdiman o. Sarê Dêrsimî zereyê nê hewteyî de yeno pêser, aştî û însanîyên wazenê. Sonê heqê qame însanî de gule ronenê. Silêman Yildiz zaneno ke na heşîrîye de sarê xo çi dîyo. Silêman Yildizî waştişê aştî ser o ma rê qisey kerd.
‘Teyna no hewte nê her roje aştî wazenîme’
Silêman Yildiz wina dest bi qiseykerdîşê xo keno: “Ma qomê Dêrsim na roje yeme pêser. Na heftê roje heqe însanî ya. Na heqî teyna tever de nêbeno. Ju ke keyeyê xo de, domananê xo rê, cenika xo rê hurmet nêdano, cîranê xo nas nêkeno, raştîya ci çin a. Çinay rê înam kena, rayê to, rayê heqî ya. Kam çûtûr wazeno hînî vengê heq bido. Kes kesî ra towa nêvazo. Aştî bêra, êyê ke tirkî qesey kenê ûnû ra bîrîme pêser, endî bes o. Heta nika xeylê sar ame kiştene, bizanê ke canevar hînî nêkeno. Ma însanî me, ma veng dame heq, ma kirmancî me, ma roje înû ra hûrmet keme, înû ke ma rê hûrmet bikerê. Hîn nêbo, têlewe de nêvîndenîme.”
‘Axir roje yena aştî bena’
Silêman Yildizî îfade kerd ke tever de delalîye est a ma de çira xirabî est a û wina vat: “Aştî yena, ma bîme bira, bîme cîran. Axîr roje yena aştî bena. Edî bes o. Qaytê Avrupa bikerê, kes kes ra towa nêkeno. Rinde, cayê xo de ronîşteyî ye. Yê ma çira jubînî qir kenê. Vane kirmancî me, veng dame hex, allahû ekber vanê, çî heşîrîye est a ma der a. Verê dewî kerdî tal, henî riznay ke peyser meşîrîme. Sarê ma bar kerd, ame. Çira bire dewa vesnenê. Zon kokî ra birnenê ke zonê xo qisêy mekerê.”
‘Kam se keno wa bikero, ma zone xo vîr na nêkenîme’
Silêman Yildizî peynîya qiseykerdîşê xo de wina vat: “Demokrasî û însanîye est a, ma vergîyê xo dame, ma çira jubînî bikişîme. Ma kî na dîna de weşîya xo ramnenîme hînî nêbeno. Kam ke aştî nêwazeno xayîn o. Ma vamê ke gon endî bes a. Na heşîrîye endî ameye serê sarê ma. aştî aştî aştî.”
