Şaredarîya Amedî ya Şaristanê Girdî, Ayşe Şan ke nameyanê muhîman ê muzîkê Kurdan ra ya, serra 29. ya wefatê xo de bi programêko hîra yê di rojan ke tede tîyatro, panel û konser est ê, do yad bikera.
Serekîya Daîreya Kultur, Huner û Karanê Komelkî, seba hunermende Ayşe Şan ke sey “Şahbanûya Bêtace” ya muzîkê Kurdan yena pênasekerdene, 17-18ê Kanûne de programê yadkerdişî organîze kena. Çalakîyanê di rojan de cuya Ayşe Şan, hunerê aye û mîraso ke verdayo seba muzîkê Kurdan, do babetanê cîyayan de bêrê qiseykerdene.
Kayê tîyatroyî do temaşekerdoxan reyde bêro têhet
Programê yadkerdişî, şewa 17ê Kanûne saete 18.30î de Salona Kulturî ya Alî Emîrî de bi nîşandayîşê tîyatroyî do dest pêbikero. Kayê tîyatroyî ke Berfîne Zenderlîoglu hazir kerdo û behsê cuya Ayşe Şan keno, do temaşekerdoxan reyde bêro têhet.
Panel do bêro organîzekerdene
Roja dîyine ya programî de, 18ê Kanûne saete 13.00î de serê gorê Ayşe Şan ê Goristanê Yenîkoyî de merasîmê yadkerdişî do bêro kerdene. Eynî roje saete 18.00î de Salona Kulturî yê Alî Emîrî de panelo bi nameyê “Cuya Muzîkî ya Ayşe Şan” do bêro organîzekerdene. Panelî de ke moderatorîya ci Salîha Ayata do bikero, Berfîne Zenderlîoglu do bi babeta “Cinîyêka Muzîkkare û Hunermende: Ayşe Şan” û Sereka Daîreya Kultur, Huner û Karanê Komelkî Zeynebe Yaş zî do bi babeta “Cuya Ayşe Şan û Muzîkê Kurdan de Cayê Aye ” pêşkêş bikerê.
25 hunermendî do konser bidê
Badê panelî saete 19.30î de konserêko taybet ke tede eserê Ayşe Şan yene wendene, do bêro organîzekerdene. Konsero ke 25 hunermendî do bêrê sahne, vengê Ayşe Şan û muzîkê aye do Amed de reya bîne gulbang bido.
Ayşe Şan ke 18ê Kanûna 1996î de Îzmîr de wefat kerd, cenazeyê xo 18ê Hezîrane de ame ardene bi Amed û bi merasîmêk Goristanê Yenîkoyî de ame nimitene.
