Bi pêşengîya MEBYA-DER’î de gerîlayê HPG’yî Çîya Farqîn bi girseyî ame yadkerdene û merasîmê yadkerdişî de wina ame vatene: “Estbîyayîşê înan seke toximêk o ke herre ser o ameyo eştene, ma bi nê hewayî şên bîyê.”
Bi pêşengîya Komela Yewî Kultur Piştgirî û Hetkarîya Keyeyanê ke Merdimê xo Derguşê Şaristanîye de Vîndî Kerdî (MEBYA-DER), dewa Etşa ya qezaya Farqînî ya Amedî de gerîlayê HPG’yî Çîya Farqîn (Haci Başaran) ke 25ê adara 2018î de Heftanîn de cuya xo vîndî kerdbî, bi girseyî ame yadkerdene. Rayberê MEBYA-DER’î, DEM Partî, DBP’yî yê merkez û qezayî, MED-TUHAD-FED, TUHAY-DER, Dayîkê Aştî, Aktîvîstê TJA’yî, endamê rêxistinanê sivîlî beşdarê merasîmê yadkerdişî bîyê. Girseyo ke ver bi keyeyê yadkerdişî rayra şi, sloganê “Şehîd namirin” vat. Dima ra girse vîyart zere û seba cangorîyanê şorişî deqeyêk rêze girewte û dima ra sloganê “Şehîd namirin” vat.
‘Înan baro sivik seba ma verda’
Raybera MEBYA-DER’î Samîya Kutay yadkerdişî de qisey kerd û vat: “Ma keyeyê xo rê serweşîye wazenê. Sereyê şarê kurdî yo birûmet û birêz Abdullah Ocalanî weş bo. Şehîdê ma rûmetê ma yê, ma bi înan sereberz ê. Rayîro ke înan akerd, ma do ê rayîrî taqîb bikerê. Înan baro sivik ma rê verda. Heta ke ma weş bê ma do xeyalanê înan bîyarê ca.”
‘Ewro heme dinya behsê kurdan kena’
Datê gerîlayê HPG’yî Çîya Farqîn, Hasan Başaranî merasîmê yadkerdişê birazayê xo de qisey kerd û vat: “Ma nê qehremanan ke cuya xo vîndî kerda, anê xo vîr û ma bi înan sereberz ê. No rayîr rayîrê şeref û rûmetî yo, ma pê xeylê keyfweş ê. Kes nêeşkeno înan rê çîyêko şaş vajo. Heta ke ma herinda înan ser o bî, ma do her timbi înan sereberz bibê. Ma ra zaf kesî nêzanê ke cenazeyê gedeyanê înan kamca de yê. Nameyê ma amebi çinkerdene la bi saya înan ewro nameyê ma dinya ra vila bîyo.
Estbîyayîşê înan sey toximêk o ke herre ser o ameyo eştene, ma bi nê hewayî şên bîyê. Heme zî bi saya nê embazanê ma yo, sere de bi saya Rayber Apo yo. 6-7 kesan reyde dest pêkerd, ewro bîyê bi mîlyonan. Ewro heme dinya behsê kurdan kena.
