Hunermend Mîr Perwer, Evîn Goyî û Abdurrahman Kizil sergêra kiştişê xo yê 3. de yenê vîrardene. Embazê Mîr Perwerî, Ferhat Demîrellî serrgêra kiştişê embazê xo de vat: “Embaz Mîr Perwerî dejê welatê xo bi deyîranê xo îfade kerdêne.
23ê kanûna serra 2022î de kiştoxêk Merkezê Kulturê Kurdkî yê Ahmet Kaya yê paytexta Fransayî Parîs de hêrişêko hovane kerd. Encamê nê hêrişî de deyîrbaz Mîr Perwer, endama Konseyê Rayberîya KCK’yî Emîne Kara (Evîn Goyî) û welatparêzo kurd Abdurrahman Kizilî cuya xo vîndî kerd. Bi rastameyîşê serrgêra hîrêyîne ya nê qirkerdişê hovane do heme hîrê şehîdî bêrê vîrardene.
Embazê Mîr Perwerî, Ferhat Demîrellî derheqê. Cuya embazê xo de ma rê qisey kerd.
‘Hozan Serhatî ra zaf hes kerdêne’
Ferhat Demîrellîyî îfade kerd ke demo ke ê unîversîte de wendekar bîyê, Mîr Perwerî şinasnayo û vat: “Embaz Mîr Perwer û ez, ma eyn şaristanî ra bîyê. Seba veyveyan ameyêne dewa ma. Mi Êlih de unîversîte wend, o zî seba xebatanê deyîrbazî ameyêne Êlih û ma keyeyêk de mendêne. Ma nêzdîyî ra yewbînan şinasnayêne. O wextî ra pey şi teber xora. Ez seba Mîr Perwerî vana Hozan Serhado dîyin. Xora ey ra zaf hes kerdêne û deyîrê ey şîrove kerdêne. Hunermendêko welatparêz bi, welatê xo ra zaf hes kerdêne. Embaz Mîr Perwer dejê welatê xo deyîranê xo de îfade kerdêne. Hunerê ey seba komelî bi.”
‘Girêdayeyê welatê xo bi o semedî ra bi hedef’
Ferhat Demîrellîyî da zanayene ke tewr peyên Stenbol de embazê xo Mîr Perwerî dîyo û wina vat: “Tewr peyên ma Stenbol de yewbînan dî. Reyêk şi Yewnanîstan û uca de ame girewtene. Dima ra zî vejîya şi Ewropa. Demo ke şi zî zerrîya ey zîze bîye û bi hêrs zî bi. Maya xo ra embaza xo ra dûrî kewt. Eke ti kurdêko welatparêz bibê û girêdayeyê erjanê xo bibê, ti benî amanc. Demo ke embaz Mîr Perwer şehîd kewt, mi bawer nêkerd, her çend embazê mi gêrayê zî ez bi zorî îkna bîya. Ez zaf xemgîn bîya û ez şaş menda.”
‘Ganî ma wayîrê hunerê Mîr Perwerî vejîyê’
Ferhat Demîrellîyî dîyar kerd ke demo ke cenazeyê Mîr Perwerî ame Mûş, dewlete astengî vetbî û hêrişê merasîmê cenaza kerd û wina vat: “Ê serran de girseyanê tewr qelabalix ra yew amebi Mûş. Dewlete cenazaya Mîr Perwerî girseyî remnaye. Remnayîş û mudaxaleyê vera cenaza vera heqanê merdiman bi û bawerî ra zî rêze nêameye girewtene. Merasîmê cenaza de zî hêrişo dîyin vera Mîr Perwerî ame kerdene. Yo yewin ey welatê ey ra dûrî vist. Zerrîya ey zaf veşayên ke şono teberê welatî. Bi telefonî mi gêrayêne vatêne, ‘welat kewto mi vîr, embazê mi, maya mi, gedeyê mi kewtê mi vîr.’ Nêverda ma cenazaya ey bivînî. Ganî ma bi her awayî wayîrê hunerê Mîr Perwer û hunermendanê xo yê şehîd vejîyê.”
