Federasyonê Elewîyan o Demokratîk (FEDA) û Yewîya Cinîyan ê Elewîyan a Demokratîke (DAKB) eşkerayî de ke bi wesîleyê Roşanê Gaxanî kerd, vengdayîşê aştî, waştiş û cuya seypê kerd.
Eşkerayîya hempare ya FEDA û DAKB’î de ame vatene ke rojanê Gaxanî de ke roja hîrêyine ya kanûne dest pêkeno û heta hewteyê çeleyî yê yewinî dewam keno, hîrê rojî roje yeno girewtene; vera şertê zimistanî yê giranî ke eşkenê can û malî zerar bidê, nîyazêk o. Ame îfadekerdene ke na roje şîret kena ke zerrî nişikîyo, kes teber mebîyo û loqme pare bibo. Ame qeydkerdene ke cemî de ke cayo ke pîrî, murşîdî û dedeyî tede yê, yenê girêdayene bingeyê manewî yê aştîya komelkî û rindîye virazenê.
‘Gaxan vengdayîşê aştî yo’
Eşkerayî de bale antene ke Roşanê Gaxanî tena peynîya serrêk nîyo û ame vatene ke vengdayîşê reyna aştîkerdişî yê xoza, însan û komelî yo. Ame vîrardene ke rayîrê Reya Heqî yê elewîyan de serrê neweyî bi behc, dişmenîye û neheqîye ra nêyeno kerdene û bale ame anteneke Gaxan wextê kesanê ke vanê “verê heme çî wa zerrî rind biba” yo.
Eşkerayîye de ame nîşankerdene ke vera xirabîya ke zêde bena, bêedaletîya ke xorîn bena û loqmayanê qijan ver de rizayîye birîndar bena û ame vatene: “Eke parekerdiş çin bo bereket çin o, eke waştiş çin bo rayîr nêşino.” Ame îfadekerdene ke nîzamê nikayênî ke mîlyonan însanan xirabîye de yê û kede yena werdene eslê Gaxanî reyde pênêyeno.
‘Bê azadîya bawerîyan aştî nêbena’
Eşkerayî de ke ame vatene Gaxan aştî yo ame vatene ke bê azadîya bawerîyan aştîya rastîne mumkin nîya. Ame vîrardene ke elewî, êzîdî, xirîstîyan, misilma û heme şarî ganî bingeyê hemwelatîya seypêye ser o pîya biciwîyê.
Eşkerayî de ke ame vatene vindertişê vera şer, înkar û dişmenî yew mesajê Gaxanî yo bingeyin o, ame dîyarkerdene ke semedê şeranê ke bi serran dewam kenê şarî de dejê girdî viraştî û wina ame vatene: “Bê aştî ne adalet beno ne zî cuya pîya bena.” Û waştişê aştîya domdare ame kerdene.
‘Bê azadîya cinîyan aştî nêbena’
Eşkerayî de sewbîna ame îfadekerdene ke cayêk de ke cinî peygoş benê aştî nêbena. Ame vatene ke bê qisey, kede û têkoşînê cinîyan ne aştî ne zî edalet mumkin a.
