Federasyonê Mîyanneteweyî yê Rojnamegeran (IFJ) eşkera kerd ke serra 2025î de 10ê ci cinî 128 rojnamegerî ameyê kiştene û 533 rojnamegerî zî girewte yê.
Federasyonê Mîyanneteweyî yê Rojnamegeran (IFJ) eşkera kerd ke serra 2025î de pêroyê dinya de 10ê ci cinî 128 rojnamegerî ameyê kiştene û zafêrê înan Rojhelatê Mîyanênî de yê. Federasyonî dîyar kerd ke na hûmare goreyê hûmara parî zaf a.
Sekreterê Pêroyî yê IFJ’yî Anthony Bellanger AFP’yî vat, na hûmare “hişyarîyêka sûre ya gerdunî” ya û îfade kerd ke hedefgirewtişo vêş yê rojnamegeran mojneno ke derûdoran de xebatê rojnamegerî bi tehluke yê.
Anthony Bellanger endîşeyê xo yê seba rewşa Fîlîstînî mojna û da zanayene ke Fîlîstîn de serrêk de tena 56 rojnamegerî ameyê kiştene.
Sewbîna Bellangerî bêcezatîya dewame şermezar kerd û hişyar kerd ke çinbîyayîşê edaletî, tekrarbîyayîşê sucanê vera rojnamegeran xo reyde ano.
Federasyonî dîyar kerd ke pêroyê dinya de 533 rojnamegerî girewte yê, çarekê înan ra zafêr Çîn û Hong Kongî de yê.
