Xecê Şen qedexekerdişê kitabê xo ercna û vat: “Kitab tena semedo ke bêro nuştiş nê, semedo ke ayakerdişê hişmendîyêk tarîxî est o.” Xecê Şen dîyar kerd ke kitabê aye tena felsefe nê, eynî wextî de mesajê gerdûnî yê azadîya cinî zî ci de yo.
Xecê Şene derheqê qedexekerdişê kitabê xo yê Humîtra de Jinnewsî ercnayîş kerd.
Felsefeya Humîtra û tesîrê aye yê Rojhelatê Mîyanên ser o Xecê Şen, dîyar kerd ke Hûmîtra nêzdîyê 5 hezar serrî verê, serkêşîya keşfkerdişê felsefeya kurdî hetê cinîyan ra kerda. Xecê Şen vat: “Hûmîtra roşnayî û roje temsîl kena; eynî wextî de sembolê têkoşînê hemverê tarî ya. Mîtra seserra 21ine de newe ra vejîyaya werte. No têgêrayîş Tirkîya, Kurdistan û Rojhelatê Mîyanên de veng da. Tesîrê komelî ser, serdemê ke ci de bîyê, wexto ke qedexe bîyo û hewldayîşê çinkerdişî bi hîrayî yenê munaqeşekerdiş. Eynî wextî de welatê ke hewl dayê nê felsefeyî ca bîyarê û cigêrayîşê verçiman yê nê warî de seranserê Kurdistanî de ameyê kerdiş, kitabî de ca gênê.
‘Zorê polîtîkaya dewlete berd’
Xecê Şen dîyar kerd ke mîyanê xebatan de çîyo tewr muhîm Jinwar o û vat, Jinwar sey cewabêk xurt hemverê hişmendî û qelema serdestî ya camêrdî vejîyayo werte. Pêwa nê zî mîyanê 3-4 serrê peyînan de bi hezaran cinî serdayîşê Keleha Zerzewanî û parestgehê Zerzewanî kerdî û bi dosyanê sexte yê arkeolojîkî yê hetê dewlete ra ameyî vetiş, ercê Kurdan waştî ke bêrê çinkerdiş. Sey milkê Tirkan ameyîne ramojnayîş û no demêk derg ameyîne qebûlkerdiş. La Mîtra zorê na polîtîka berd. Yê ke kitab wendî, êdî bi perspektîfêk bîn nêzdîyê herêmê bîyî. Bi taybetî sembolê Mîtra, polîtîkaya dewlete pûç kerd.”
Sebebê qedexekerdişî
Xecê Şen bale ant sebebê qedexekerdişî ser o û vat: “Kurdkî sey zimanêke nênas û hetê dewlete ra ameya qedexekerdiş, yena vînayîş la kitab zî cewabê nê qedexekerdişî bî. Felsefa cuya xoza de, cuya têduştî û komelî fînena çiman ver. Yew zî sebebê qedexekerdişê kitabê min zî o yo ke planê hukmatî na cografye de vînî kerd. Sebebê hîrêne zî o yo ke kitab Kurdkî ameyo nuştiş. Yew sebebo tewr muhîm zî îdiayê propagandaya PKK’î yo. Bi bahaneyê ke felsefeya Abdullah Ocalan de paralel o hedef ame girewtiş. Eke dewlete kitabêk yan çîyêk bîn qedexe bikero, qîmetê nê çî zaf zêde yo. Semedê amadekerdişê nê kitabî ma xeylêk kede da. Yê ke kitab wendê vanê ke semedê qedexeyî çapê diyîn nêvejîyayo. Ma nêeşkenê nê kitabî newe ra çap bikerê.”
Xecê Şen bale ant serê vatişê Abdullah Ocalanî û wina qedêna: “Mi resimêk waşt ke her kes biewno; ez bîya veng, semedo ke her kes bieşnawo, semedê herra xo. Mîtra nê vengî ancî vet vernî.”
