Serekdewletê DYA’yî Donald Trumpî dîyar kerd ke seba ke rejîm hêrişê şarî nêkero hişyarî daye Îranî û vat eke hêrişî dewam bikerê ê do mudaxaleyê Îranî bikerê.
Serekdewletê Dewletanê Yewbîyeyan ê Amerîka (DYA) Donald Trump beşdarê televîzyonê Foxî bi, derheqê serewedaritişê şaranê Îranî qisey kerd. Trumpî îfade kerd ke wexto ke newe çalakîyan dest kerdbî ci seba ke hêrişê şarî nêkerê rejîmê Îranî hîşyar kerdo û wina va: “Nika zaf zêde mordemî beşdarê çalakîyan benê. Mi hîna reyê zê na defa nêdî ke şar teyê çalakîyan bîyo. Hêvîyêka înan a zaf girde est a. Wazenê endî çîyê bêro viraştene. Biewnê welatê înan 150 serre apey şîyo. Mi rejîmê Îranî hişyar kerd. Eke hêrişê şarî bikerê û mordeman bidejnê, ma zî înan xeylê hişk ceza kenîme. Mi na yewe bi vengêko xeylî zelal û berz vate. Çîyo ke ma bikîme o yo.”
Trumpî vat Îranî verî hêrişê şar û çalakîyan kerdêne û wina qedîna: “Verî bêkontrol û bêînsaf hêriş kerdêne. Mi înan ra va şima eke hêriş bikerê ez cewabêko hişk bidî. Heta nika zafêrî çîyêde nîyanênî nêkerdê. La vera rejîmî çoşêko gird mîyanê şarî de aseno.”
