Welatijanê Amedî ke vera hêrişanê taxanê Şêxmeqsûs û Eşrefîye wirzîyayê, hêrs û nerazbîyayîşê xo mojna û vat: “Ganî şarê ma her ca de vera nê hêrişan vengê xo berz bikero. Rojava çin ba Amed zî do çin ba.”
Bi pêşengîya Platformanê Sazgehanê Demokratîk de xeyle şaristananê vakurê Kurdîstan û Tirkîya de derheqê hêrişanê çeteyanê hukmatê demkî yê Sûrîye û dewleta tirkan ê vera taxanê Şêxmeqsûd, Eşrefîye û Benî Zêdî yê Helebî de rayîrşîyayîş û eşkerayî ameyê kerdene. Şaristanan ra yew ke rayîrşîyayîş ame kerdene zî Amed bi. Welatijanê Amedî rayîrşîyayîşî de reaksîyonê xo vera nê hêrişan mojnayê û ajansê ma rê qisey kerd.
‘Ma parçeyêk ê, ma zerrîyêk ê’
Welatija bi nameyê Delal Aktaş dîyar kerd ke hêrişê vera taxanê Şêxmeqsûd û Eşrefîye yenê kerdene nêyenê qebulkerdene û hêrişî şermezar kerdê. Delal Aktaş îfade kerd ke dewleta tirke nêwazena Rojava serkewa û wina vat: “Seba ke Rojava serkewte bîye, nêverdanê ke serkewte bîmana. Nê semedî ra ma heme peyê Rojava de yê. Rojava Vakur a, Vakur Rojava yo û sey Rojhelat û Başûrî yo. Wa Vakur û Başûr bêveng nêmanê. Willeyî ma parçeyêk ê, ma zerrîyêk ê. Wa her kes ney bizano.”
‘Wa Rojava bizana ke ma peyê înan de yê’
Delal Aktaş dewamê qiseykerdişê xo de wina vat: “Ez vengdana şarê xo, wa wirzê lingan ser. Heta ke ma nêwirzê, dişmenê hov do her roje hêriş bikero. Wa baş bêro zanayene, ganî ma pêro wirzê, dest bidê yewbînan, dest bidê Serekê xo û dest bidê Rojavaya xo. Rewşa Rojhelatî baş nîya, ya Rojava zî baş nîya. Siba do dora ma zî bêra. Demo ke ma pêro wirzê belkî ma do bieşkê na zîncîre bişiknê. Eke ma nêwirzê dişmenê Vakurî xidar o, o wext ma do nêeşkê nefes bigîrê û keyeyanê xo ra vejîyê. Wa Rojava bizana ke ma peyê aye de yê.”
‘Ma do her ca de vengê xo vejê’
Rayberê DEM Partî yê Bismilî Abdulkerîm Yildizî zî wina vat: “Ma qezaya Bismilî ra seba Rojava ameyê. Demo ke Rojava çin a, ma yew zî çin ê. Derheqê Rojava de çi bedêlêko giran est bo ma do bidê; ma seba ney amade yê. Rojava îradeyê şarê kurdî ya. Yanî wa tu kes nêvajo Rojava çin a; demo ke Rojava çin ba do Amed zî çin ba. Ma na rewşe tu wext qebul nêkenê. Ma do her ca de vengê xo berz bikerê.”
‘Serkewtiş do yê ma bo’
Welatijê bi nameyê Emîn Ermînî zî îfade kerd ke vera hêrişanê taxanê Şêxmeqsûd û Eşrefîye beşdarê rayîrşîyayîşî bîyo û wina qisey kerd: “Vakur, Rojhelat û çar hetanê Kurdîstanî de ma aştîwaz ê. Labelê gonîwerî hêrişanê xo yê ma ser o domnenê û her dem qirkerdişan kenê. Ma nika nê çîyî şermezar kenê. Serkewtiş do yê ma bo.”
‘Vengdayîşê ma her tim seba aştî yo’
Yusuf Aktaşî zî bale ant prosê “Aştî û Komelê Demorkatîk” ê Tirkîya û vakurê Kurdîstanî ser o û wina vat: “Bi destpêkerdişê prosesê aştî Serekî seba aştîya Kurdîstan û pêroyê dinya vengdayîş kerd. Seba ney ganîş heme sazgeh, partî û şarê ma dest bidê yewbînan û ma wayîrê yewbînan vejîyê. Çi sîyasî bo çi komelkî bo, yo tewr muhîm exlaq û merdimîye yo. Mîyanê 50 serranê vîyarte de ma xeylê bedêlî dayê. Ero Rojava bi hezaran bedêlî dayê. Ma her ca de yê. Vengdayîşê ma her tim seba aştî yo.”
‘Yewîye hêzê ma yo’
Welatij Muahmmed Ekîncîyî zî dîyar kerd ke ganî şarê kurdî wirzo lingan ser o, vera hêrişanê ke Heleb de yenê kerdene vengê xo berz bikero û vat: “Şero ke nika Rojava û Rojhelat de dest pekerdo û kiştişê merdimanê xo, ma qebul nêkenê. Ma wazenê ke şarê ma wirzo lingan ser o û wa qirkerdiş û kiştişan qebul nêkero. Amancê ma o yo ke ma yewîye û tifaqê xo bikerê yew. Dewletê îqtîdarî nêwazenê kurdî tifaqê xo, yewîya xo xurt bikerê. O semed ra demo ke kurdî bibê yew, îqtîdarî nêwazenê amancê kurdan bêro ca û herra xo bipawê. Ganî şarê ma her ca de vera nê hêrişan vengê xo berz bikero. Yewîye hêzê ma yo.”
