Cenazaya Fermandarê Hêzanê Ewlekarîya Zereyî yê Helebî Ziyad Helebî (Ziyad Qedûr) û cenazaya şervananê HSD’yî Malîk Mihemed û Brûsk Mexaric Kobanî de bi beşdarîya des hezaran ameyê definkerdene.
Fermandarê Hêzanê Ewlekarîya Zereyî yê Helebî Ziyad Heleb (Ziyad Qedûr) ke hêrişanê vera taxanê kurdan Şêxmeqsûd, Eşrefîye û Benî Zêd ê Helebî de cuya xo vîndî kerdbî, şaristanê Kobanî yê Rojavayê Kurdîstanî de bi beşdarîya des hezar welatijanê Vakur û Rojhelatê Sûrîye de ame definkerde. Cenazaya Ziyad Helebî reyde, cenazayê şervananê Hêzanê Sûrîya Demokratîk (HSD) Malik (Malik Mihemed) ke 10ê çele de Tebqa de û Birûsk Mexaric Behcet ke 12ê çele de Kobanî de cuya xo vîndî kerdbî, ameyê definkerdene. Cenazayî Şehîdgehê Kobanî de ameyê definkerdene. Merasîmî de des hezar welatijan sloganê “Şehîd namirin” vat û fotografê Ziyad Heleb, Malîk Mihemed û Birûsk Mexaric ameyê girewtene.
Merasîmî de Hemserekê Meclîsê Keyeyanê Şehîd ê Kantonê Firatî Mistefa Êto, Cagirê Hemserekanê Meclîsê Rayber ê Rayberîya Xosere Hesen Koçer, Hemserekê Meclîsê Rayber ê Rayberîya Xoser a Demokratîke Hisên Osman, nameyê Hêzanê Ewlekarîya Zereyî Fermandar Arîn Kobanî û hemrayê Ziyad Helebî Harûn Kobanîyî qisey kerd.
Qiseykerdoxan qiseykerdişanê xo de bale ant xoverdayîşê cangorîyan ser o û sozê berzkerdişê têkoşînî da.
