Endamê Kongreya Amerîka Lindsey Grahamî hişyarîyêka hişke hukmatê Sûrîye û Tirkîya rê mojna.
Lindsey Grahamî da zanayene ke eke hêrişê serê Kurdan zêde bibê, ê do hemverê ney vejîyê û binê ci xêz kerd û vat ke tena kurdî eşkenê girewteyanê DAIŞ’î bipawê.
Lindsey Grahamî hesabê xo yê Xî de eşkerayîyêk vila kerde û fikarê xo yê vera hukmatanê Sûriye û Tirkîya yê ke hemverê kurdan ê îfade kerdê.
‘Kurdî mutefîkê ma yê zaf xurt ê’
Grahamî eşkerayîya xo de nê vatî:
“Seke mi verî zî vatbi, roje bi roje ez bîneyna vera hukmatê newe yê Sûrîye yo ke Tirkîya de hemkarîye keno bifikar bena ke operasyonê leşkerî vera kurdan kenê.
Kurdî binvistişo domdar ê DAIŞ’î de Sûrîye de mutefîkê ma yê xurt ê.”
Babeta girewteyanê DAIŞ’î
Grahamî bale ante tehlukeyê girewteyanê DAIŞ’î ser o û wina dewam kerd:
“Kontrolê nêzdîyê 9 hezar girewteyanê DAIŞ’î yê ke seba ma tehdît ê destê înan (HSD) de yê.
Seba menfaetanê ewleyîya ma ya neteweyî ya heyatî muhîm a ke nê girewteyî nêagêrê qadanê şerî.”
Grahamî dîyar kerd ke ey piştî danê ke seba hukmatê demkî yê Sûrîye şansêk bêro dayene la hişyarî zî daye: “Labelê eke hêrişê hêzanê Sûrîye ke bi paştîdayena Tirkîya vera kurdan zêde bibê, no rewşeka newîye vejeno meydan. Ez bawer kena ke paştîdayenêka girde hetê her di partîyan (Komarperwer û Demokrat) ra biba, ma do pîya hemverê nê kerdişan vejîyê.”
‘Şima şaş ê’
Lindsey Grahamî peynîya mesajê xo de bi rengêko zelal red kerd ke girewteyê DAIŞ’î teslîmê Tirkîya yan zî Sûrîye bibê, no seba înan rîsk o û wina vat: “Eke kesê ke bawer kenê girewteyê DAIŞ’î bi destê kurdan nê bi destê artêşê Sûrîye yan zî Tirkîya baş yênê pawitene, ê kesî zaf şaş ê.
‘Weçînitişanê xo aqilane bikerê’
Na eşkerayîya Lindsey Grahamî demêko winasîn de ameye dayene ke kaosê Dêr Hafirî zêde bîyê û grûbê çeteyanê hukmatê demkî yê Sûrîye dormeyê Dêr Hafir û Mesken de bi ca bîyê û bombabaran kenê. Na eşkarayî sey yew hişyarî ameye vînayene.
HSD’yî da eşkerakerdene ke Dêr Hafir de dronê Tirkîya paştî danê hukmatê Şamî.
