Nuştox û temsîlkaranê rêxistinanê sîvîlî dîyar kerd ke hêrişê vera Rojava bi hişk şermezar kenê û vat: “Hêrişê vera Rojava nêyenê qebulkerdene. Ganî ê kesanê ke suc kerdo, mehkemayanê mîyanneteweyî de bêrê muhakemkerdene.”
Meclîsê Ziwan ê Konseyê Şaristanî yê Amedî kombîyayîşê xo yê asayî yo 2. kerd. Kombîyayîşî de heqê ziwanî de ame qiseykerdene û ame dîyarkerdene ke seba ke ziwan aver şêro do xebatî bêrê kerdene. Beşdarê kombîyayîşî derheqê hêriş û planê binvistişê destkewteyanê Rojava de ajansê ma rê qisey kerd.
Serekê Têgêrayîşê Aştîya Zereyî yê Vakurê Kurdîstanî Ahmed Kanî, Serekê Komela Farqînijan Cemal Dogrul û Nuştox û endamê Meclîsê Ziwanî Denîz Gunduz ke beşdarê kombîyayîşî bîyê, vera hêriş û cehdanê planê binvistişê Rojava reaksîyon mojna û vat kurdî do nê çîyî qebul nêkerê.
‘No karê lêmin bi pêşengîya dewleta tirkan yeno kerdene’
Serekê Têgêrayîşê Aştîya Zereyî yê Vakurê Kurdîstanî Ahmed Kanîyî dîyar kerd ke seba ke hêrişê vera Rojava bêrê vindertene, Neteweyanê Yewbîyayeyan rê mektub erşawito û vat: “Ê sucanê vera Heleb yanî taxanê kurdan Şêxmeqsûs û Eşrefîye ser o ma waşt ke ê ke suc kerdo, mehkemaya mîyanneteweyî de bêrê muhakemekerdene. Yanî ê sucî ke kerdê şima zanê zerrîya merdiman dejnaye, merdimî qatanê berzî ra eştê war, xeylê karê lêminî kerdê. Ney ser o ma seba Mehkemaya Mîyanneteweyî yê Heqanê Merdiman, bi nameyê Xebata Aştîya Zereyî dewa akerde. Na plansazîya dewletanê îşxalker sey Tirkîya ya, înan wina kerd. Heta ez eşkena vaja ke ‘Peymana 1ê Nîsane’ ameye qebulkerdene. La dima ra Wezîrê Karanê Teberî yê Tirkîya vengda temsîlkaranê hukmatê Şamî, înan apey game eşt û vat, ‘mekerê’ û rasta zî no karo lêmin, bi pêşengîya dewletanê îşxalker yeno kerdene.
‘Ganî ê bêrê muhakemekerdene’
Ahmed Kanî îfade kerd ke seba ke ê sucî ke ameyê kerdene dinya rê bêrê îsbatkerdene û ganî ê kesî ke sucê giranî kerdê bêrê muhakemekerdene û cezakerdene.
‘Tena hêzê çeteyî nê hêzê teberî zî qirkerdişan kenê’
Serekê Komela Farqînijan Cemal Dogrulî zî dîyar kerd ke hes keso ke xo ra vano, ‘ez kurd a’ û zerrîya înan de a kurdîtîye û heskerdişê kurd û Kurdîstanî est bo, ganî nê çîyî ke Rojava de hemverê kurdan de yenê kerdene, înan qebul nêkero û vat: “Rasta zî hem wijdan qebul nêkeno hem zî hetê merdiman ra û hem zî demo ke bifikirîyê, hetê bawerîya Îslamîyetî ra zî ganî qebul nêkerê. La çi heyf ke tena kurdî nê ganî her kes hemverê nê kerdişanê çeteyan wirzo. Tena çeteyî nê hêzê teberî zî qirkerdişan kenê. Çeteyê DAIŞ û hêzê bînî wazenê kurdan ser o zor û zehmetî newe ra dewam bikerê.”
‘Yewîya şarê kurdî awan bena’
Cemal Dogrulî îfade kerd ke xoverdayîşê Rojava, tena seba Rojava nîyo seba heme kurdan o û nê çîyî vatî: “Senî beno wa bibo do xoverdayîşê Rojava serkewo. Beno ke ewro biney zor û zehmetî est bî, beno ke ewro biney astengî vernîya înan de est bî la do kurdî hem bi xoverdayîşê xo, hem bi yewîya xo serkewê û serkewtiş ê ma yo.”
‘Ma do nê rojanê tarî xo ra pey verdê’
Nuştox Denîz Gunduzî zî vera hêrişanê Rojava reaksîyon mojna û îfade kerd ke şarê kurdî do nê rojan de, rojanê xeylê tarî û giran vîyarno û vat: “Zerrîya ma dejena; çi Heleb bo, çi cayê bînî bibê. Nika şerêko giran est o û reyna hemverê şarê ma yo. Tena vera kurdan nê, uca de vera elewî û durzîyan zî hêrişê îşxalkerdişî qewimîyayê. Demêko derg o ke hêrişêko winasîn est o û ma ney şermezar kenê. Ma wazenê ke uca de heme şarî bieşkê xo îfade bikerê û xo rayra berê. Zerrîya ma înan reyde ya. Ma şarê kurdî xeylê rojê wina tengî dîyê la ma do nê rojan xo ra pey verdê û ma bi hêvî ameyoxê xo ra biewnê.”
