Muxabirê Ajansê Welatî Nedîm Oruçî 14ê çeleyî de bi derbkerdiş ame destbendkerdene û di rojî ra pey ame girewtene. Rojnameger Memet Alî Ertaşî qerarê girewtişê Nedîm Oruçî şermezar kerd û vat: “Zordarîye nêeşkena vernîya raştîye û heqîqetî bigîra.”
Muxabirê Ajansê Welatî (AW) Nedîm Oruç 14ê çeleyî de taxa Nurî ya Cizîre de wexto ke çalakîyê vera hêrişanê Rojava teqîb kerdêne, hetê polîsan ra bi derbkerdiş ame destbendkerdene û di rojî ra pey ame girewtene.
Temsîlkarê Basin-Îş’î yê Amedî rojnameger Hakki Boltanî zî dîyar kerd ke sîstemê Tirkîya dişmenîya xo ya vera rojnamegeran bêmabên domnena û derheqê qerarê destbendkerdişê Nedîm Oruçî de wina vat: “Nedîm Oruç embazê ma yo rojnameger o û qade de xeberî taqîb kerdêne. Hêrişî zafane vera embazanê ke qade de xeberan taqîb kenê, yenê kerdene û ê yenê destbendkerdene û girewtene. Bi îşkenceyî wazenê înan bitersnê û şexsê înan de heme rojnamegeran bitersnê.”
‘Çapemenîya Azade sere nêtewnena’
Boltanî eşkera kerd ke oyo ke yeno hedefgirewtene tena rojnamegerî nîyê, rojnamegerî bi xo ya û wina dewam kerd: “Amancê înan tena girewtişê rojnamegeran nîyo, rojnamegerî bi xo kenê hedef û wazenê rojnamegerî orte ra wedarnê, bi taybetî Çapemenîya Azade. Labelê heme muxabir, heme kameramanî, heme xebatkarê çapemenîya azade na babete de bi qerar ê û rojanê de ke hêrişê tewr giranî înan ser o yenê kerdene zî sereyê xo nêtewnenê. Xebatê xo aver berdê û xo xurt kerdo. Do no dimayê hêrişê vera Nedîm Oruç zî wina bo. Heme embazê ey do vindertiş, helwêst û xebata ey esas bigîrê.”
‘Ma do heta peynî heqanê ey bipawê’
Rojnameger Memet Alî Ertaşî zî vera destbendkerdişê Nedîm Oruçî reaksîyon mojna û vat: “Destbendkerdiş û girewtişê embazê ma yê rojnameger Nedîm Oruçî zî netîceyê polîtîkayanê Tirkîya yo. Ma destbendkerdiş û girewtişê ey şermezar kenê û vanê; ma do heta peynî heqanê ey bipawê. Hem hetê huqûqî ra hem zî hetê rojnamegerî ra ma do bipawê.”
‘Zordarîye do vernîya raştîye û heqîqetî nêgêrê’
Ertaşî peynîya qiseykerdişê xo de derheqê xebatanê rojnamegerî de nê çîyî vatî: “Seba ke heqîqet nêra vînayene, raştîye nêra vînayene, teda û zordarîya vera komelî nêra vînayene, sere de rojnamegeran destbend kenê û gênê. La çend destbend bikerê, çend bigîrê zî; nê girewtiş, destbendkerdiş, teda û zordarîya vera çapemenîye seba ke raştî bêrê vînayene do nêbê asteng. Heqîqet û raştîye do tim şarî reyde bêrê parkerdene.”
