Amed – Berdevka TJAyê ya berê Ayşe Gokkan a ku li Girtîgeha Jinan a Sîncanê ya Enqereyê tê ragirtin bal kişand ser peyama Rêberê PKKê Abdullah Ocalan û bang li hemû saziyên sivîl kir ku ji bo aştiya civakî bibin seferber.
Berdevka Tevgera Jinên Azad (TJA) a berê Ayşe Gokkan ku li Girtîgeha Jinan a Sîncanê ya Enqereyê tê ragirtin derbarê geşedanên ku li Kurdistan, Tirkiyeyê û li Rojhilata Navîn diqewime de bi rêya malbat û parêzera xwe ji girtîgehê peyamek bi rê kir. Gokhan di peyama xwe de balê dikşîne ser hêzên despot ên ku beriya hezar salan çawa ji bo desthilardarî ya xwe li ser piyan bihêlin û niha bi heman awayî hê jî têdikoşin, şer dikin û wiha got: “Hêza hegemonan têrî têk birina demokrasiya civakê nake.”
Ayşe Gokhan, di destpêkê de anî ziman ku hêzên despot ên beriya hezar salan çawa li ber têkoşîna gelan li ber xwe nedane û têk çûne û anî ziman ku dê dawiya van pergalên heyî jî heman be. Ayşe Gokkan wiha got: “Di sala nû de kê devê xwe vekir (hem li welêt hem jî li cîhanê) got: ‘sala nû bila bibe wesîleya azadiya jinê, refaha aborî, parastina xwezayê, aştî, wekhevî û demokrasiyê’. Ev tê wateya ku ev hêjayî li welatê me tune ne. Îro rewşa Rojhilata Navîn û Tirkiyeyê jî diyar dike ku ne ev hêjayî bin, netew dewleta navendparast dê di rojekê de bi temamî têk biçin. Pergala dewletê ji yên berî vê pergalê ku weke qiral, împarator, paşa, sûltanan hwd kîndartirin. Ew hezar salan li ser piyan man. Lewma di 200 salî de pergala dewletê têk çû.”
‘Diyalog û muzakere’
Ayşe Gokkan, diyar kir ku pirsgirêka Kurd a ku bi salan e heye bi diyalog û muzakereyan nehatiye çareserkirin û wiha berdewam kir: “Yek ji şer û pevçûnên di Rojhilata Navîn de û li Tirkiyeyê 40 sal in şerê zêde yê dem bi dem e. Ango pirsgirêka kurd a sed sal in ku bi muzakere û diyalogê nehatiye çareserkirin e. Dîsa nîvê netewa kurd û netewa din li Tirkiyeyê û li Sûriyê dijîn. Di vê rastiyê de avakirina aştiya civakî ya li Sûrî û Tirkiyeyê bi hev ve girêdayiye, dîrok jî şahidê vê rastiyê ye. Têkçûna dewletên navendparast bi rejîma Baas re dubare hat xuyakirin ku di hundir de pergal çawa lerizî ye û di demeke kin de hilweşiyan.”
‘Dewlet ji xeynî berjewendiyên xwe yên takekesî kesê nafikirin’
Di berdewamê de Ayşe Gokkan, bi lêv kir ku dewletên hegemon tu carî ji xeynî berjewendiyên xwe yên takekesî pê ve yên gel nafikirin û ev tişt gotin: “Iraq, Lîbya, Lubnan, Afganîstan, Sûrî doneyek hevpar nîşan dide ku pergalên dîktator di hundir de rizîne. Û êdî pergala yek mêr, yek ziman, yek ol-mezheb xîtabê civakê nake. Ne ciwan ne jî civak naxwaze ji bo serdestan şer bike. Ruxmê ku ji bo dewleta xwe, xwe afirandî îro li Sûrî ne leşker ne ciwan ne jî gel ji bo Rejîma Baas şer kir. Ku rêveberiya welat ne demokratîk, xwezayî, azadiya jinê be dibe lîstika hegamonan. Dewlet hemû hêzên çekdar di bin destê xwe de ava dike, li xwe tapû dike, lê dîsa jî têk diçe. Li Sûrî bi sed hezaran leşker, tanq, top û balafirên şer yek gule neteqandin û teslîmî HTŞê bûn. Çima? Ji bo ku ev pergal ne ya civakî ye, pergaleke ji bo berjewendiyên civakê xizmetê nake ye, dê çima ev şer ê civakê be? Pergala dîktatoran ne hêjayî guleyekê ye jî. Lewre temenê dîktatoran ji tevgerên azadîxwazan kintir e.”
‘Nebûn bin çengên desthilatdaran’
Bi domdarî Ayşe Gokkan, bi bîr xist ku di vê sed salê de ev rewş hîn bêhtir ber bi çav bûye û wiha pê de çû: “Dewletên netew hewce ye bi vê rastiyê re hevrû bibin, xwe li gorî demokrasî, wekhevî, azadiya jinan biguherin û veguherin. Li Tirkiyeyê jî rewş hatiye vê merheleyê. Li welatê me wekheviya cudatiyan bi rêhevaltiya cewherî ya demokratîk hebe, hêza hegemonan têrî têk birina demokrasiya civakê nake. Her caran rexnekirina hegemonan an jî tawanbarkirina welat ji hilweşandinê nefilitîne û wê nefilitin jî. Li Sûrî, gel, ciwan, ji xwe parastinê nereviyan. Piştgirî nedan desthilardariyê û nebûn binçengên wî.”
‘Bi heft xalan bang kir’
Ayşe Gokkan, di dawiya axaftina xwe de bal kişand ser heft xalên ku Rêberê PKKê Abdullah Ocalan di peyama xwe de anîbû ziman û got: “Rêberê Gelê Kurd birêz Abdullah Ocalan bi heft xalan bang kir. Ji bo ku Tirkiye wekî Suriyeyê nebe hewce ye pirsgirêka Kurd bi diyalog û muzakereyan çareser bibe û li Rojhilata Navîn bibe mînak. Rêveberiya demokratik a xweser bi aştiya civakî li Kurdistan, Tirkiye û Sûriyeyê li Rojhilata Navîn hêviya pêşeroja mirovahiyê ye. Em di bin tecrîda giran de bin jî bang li hemû sazî û dezgehên hiqûqnasan, mafê mirovan, mafên jinan, ekolojîk, demokratîk, rojnameger, nivîskar dikin ku ji bo aştiya civakî seferber bibin da ku şert û mercên Rêberê aştiyê birêz Abdullah Ocalan azad bike, fikir û ramanên xwe bi Kurdistan, Tirkiyeyê û Rojhilata Navîn re parve bike, da ku êdî şer raweste û ne Kurd ne jî Tirk jiyana xwe ji dest bidin. Hemû amûr, çekên şer jî nikare demokrasî ya civakê têk bibe. Hêza hegemonan nikare demokrasiyê têk bibe.”
