KJK’yî xoverdayîşê şaranê Rojava û Rojhelatî yê vera hêrişanê jenosîdî ke de xorîn benê, selam kerd. KJK’yî bale ante planê emperyalîstî ser o wazenê Rojhelatê Mîyanênî bikerê Xeza û venga raya pêroyî ya dinya da û wina vat: “Eke vernîya nê kerdişan nêra girewtene, dişmenîya mabênê şaran do vila biba.”
Komela Cinîyanê Kurdîstanî (KJK), derheqê serewedarnayîşê şarî de ke Îran û Rojhelatê Kurdîstanî de berz benê û hêrişanê jenosîdî yê vera Rojava de eşkerayîyêka hîraye weşanaye.
Eşkerayî de ame vatene ke şarî bi serewedartişê “Jin, Jiyan, Azadî” kewt qonaxêka tarîxî ya newîye û polîtîkayê emperyalîstê ke Rojhelatê Mîyanênî de yenê rayraberdene, şaran benê prosesêkê îmhakerdişî.
Eşkerayî de wina ame vatene: “Ewro Rojhelatê Mîyanênî de bi destê îqtîdarê herêmkî û hegemonîkan heme berê cehenemî akerdî yê. Nê hêzê ke bingeyê feydeyanê xo yê jeopolîtîkan ser o dinya kenê texteyê setrencî, berpirsîyarê heme qirkerdiş, koçberî, wêranî û komployan ê ke herêma ma de qewmîyenê.
Îqtîdarkerdişê HTŞ’yî, Rojhelatê Mîyanênî de vera hîlala şîîyan dorpêçêko newe, dayîşê hînterlandêko newe yê Îsraîlî û girewtişê Deryaya Sipî amanc keno. Na rewşe bi ronayîşê yew konseptê îmhakerdişî yo newe yê vera kurdan şênber bîyo. Îqtîdarkerdiş û dewletkerdişê HTŞ’yî, xencerêk o ke vera ameyoxê azad ê demokratîk yê şaran, cinî û Rojhelatê Mîyanênî yo.
Têkilî û hemkarîya ke dewleta tirkan Sûrîye de hêzanê cîhadîstan reyde ronaya, talûkeyin a. Wa nêro vîrkerdene ke ewro hêrişê ke Sûrîye de yê kurdan reyde sînordar nêmanenê; eke vernîya nê şîyayîşê tehlukeyinî nêgêrîya, dişmenîya mabênê şaran de vila bena.
Îran de bi hezaran însanê ma ke cuya xo ra bîyî, bi hezaran destbendkerdeyî, îşkence dîyî. Ewro Îran de dramaya dîyine ya Xeza yena vînayene. Bêvengîya raya pêroyî ya dinya rayîrê merdişan akena. Ma venga raya pêroyî ya dinya, strukturê pêşkêşkaran-çepgiran-demokratan ê cinîyan danê ke bi têkoşînê azadîye, edalet, seypêyî û demokrasîye piştîdayîşê şar û cinîyanê Îranî bikerê.”
