Berpirsîyarê Nêweşxaneyê Bîyayîşî yê Kobanî dîyar kerd ke oksîjen zaf kêm bîyo û gedeyî mergî reyde rî bi rî yê û vengda ke wa dorpêç cade bêro wedaritene.
Hêrişê çeteyanê HTŞ û SMO’yî yê vera Kobanî dewam kenê. Roja 11. ya dorpêçî de Kobanî ke bi hezaran koçberê Efrîn, Reqa, Şehba û Tebqa tede yê, dorpêç de ya awe, ceyran û înternet ameyê birnayene.
Berpirsîyarê Nêweşxaneyê Bîyayîşî yê Kobanî Cîhan Xelîlî derheqê tesîrê dorpêç yê serê nêweşxaneyî de ajansê ANHA’yî rê qisey kerd.
Cîhan Xelîlî nê vatî: “Nêweşxane de 8 gedeyî kuvez de yê û ceyran bi temamî birîyayo. Oksîjen, şit û derman qedîyenê. Destur nêdîyeno ke malzemeyê weşîye bikewê şaristan. Tena no nêweşxane vakayanê giranan qebul keno. Roje de hema hema hewcedarîya 10 gedeyan seba kuvez û oksîjenî est a. Oksîjen tewr zaf qasê hewteyêk est o, dima do biqedîyo.”
Xelîlî vengda dezgehanê weşîye yê mîyanneteweyî û dezgehanê ke heqanê qijan pawenê û vat: “Hema ke vera gedeyan qirkerdişo bêveng nêbîyo ganî dorpêç cade bêro wedaritene. Ganî cade derman, oksîjen û malzemeyê germinkerdiş û weşîye bikewê şaristan. Şar felaket reyde rî bi rî yo. Tena gedeyê kuvezan nê bi hezaran qijî rîyê dorpêçî ra dej ancenê.”
