Avûkat Cemil Karakoyun: “Dekewtişê warê leşkerî sey îxlalî eşkeno bêro munaqeşekerdene la sûcdarîya sey endamîya rêxistine û propaganda huqûqî nîya. Pê destbendkerdiş û tepiştişî wazenê şarî bitersnê.”
Vera hêrişanê çeteyanê HTŞ û DAÎŞ’î yê vera Rojavanî sey her cayê dinya Vakurê Kurdîstanî de zî protestoyê haştîyane yenê kerdene. Nê çalakîyan de polîsî hêrişê şarî kenê û bi derbkerdişî tepişenê. Sere de Mêrdîn Şirnex, Riha, Wan û Bedlîs de bi seyan kesî ameyî destbendkerdene, bi desan kesî ameyî tepiştene. Cinî û domanî zî tede kesê ke ameyî destbendkerdene ameyî derbkerdene, raştê îşkence, tehdît û muameleyê xirabî ameyî. Reyna bêavûkat îfadeyê înan ame girewtene û înan rê ajanîyê ameye ferzkerdene.
Şûbeyê OHD’yî yê Mêrdînî ra avûkat Cemil Karakoyunî ard ziwan ke proses bi temamî bêhuqûq o, heqê xopawitişî ame astengkerdene û vat bi hewayêkê sîstemakî îşkence ame kerdene. Karakoyunî îfa de kerd sereştişê keyeyan de şîfreyê bizorî ameyî girewtene, raporê derbkerdişî nêameyî dayene û vat ame cehdkerdene ke delîlî bêrê afiranyene. Sey nimûneyê Dîyar Koçî rewşa destbendkerdişê tay kesan ameye nimitene.
Karakoyunî vat: “Tepiştişî bingeyê ‘endamîya rêxistene’ û ‘propaganda’ de ameyî kerdene. Dekewtişê warê leşkerî yê qedexeyî sey îxlalî eşkeno bêro munaqeşekerdene la sûcdarîya sey endamîya rêxistine û propaganda huqûqî nîya. Binpaykerdişê heqanê bi hewayêkê sîstematîkî dewam kenê. Pê destbendkerdiş û tepiştişî wazenê şarî bitersnê û bikerê bêveng.”
