Êlih – Rêveberê ÎHDa Êlihê Alî Karadogan diyar ku tevî paymana di navbera HSDê û hukûmeta demkî ya Sûriyeyê heye jî dijminatiya Tirkiyeyê didomen û wiha got: “Divê destkeftî werin parastin.”
Êrişên çeteyên HTŞ, DAIŞê û yên hêzên paramîlîter ên girêdayî Tirkiyeyê ji 6ê Çileyê di encama berxwedana gelê Kurd ên Rojava, her çar aliyê Kurdistanê û li Ewropayê encam da û di navbera Hêzên Sûriyê yên Demokratîk (HSD) û hikûmeta demkî ya Sûriyeyê de peymanek hate îmzekirin. Tevî ku peymana hatiye îmzekirin bajarên rojavayê Kurdistanê di bin dorpêça çeteyan de ye.
Rêveberê Komeleya Mafên Mirovan (ÎHD) a Êlihê Alî Karadogan derbarê geşedanên li rojavayê Kurdistanê diqewimin ji Ajansa Welat (AW) re axivî.
‘Tirkiye nahêle alîkarî biçin’
Alî Karadogan bal kişand ser bûyerên ji sala 2011an vir ve li rojavayê Kurdistanê tê domandin û got “Ev êrişên ku bi rêk pêk li ser Rojava tên kirin bi alîkariya dewletên navneteweyî ye. Li dijî vê yekê dîsa jî gelê Kurd li ber xwe dide. Di êrişên dawiyê de jî wekî her car, li dijî dagirkeran şer kirin. Her wiha gelê Bakur jî bi her awayekî alîkariyê didin Kurdên li Rojava. Ji ber ku alîkariya xurek û hwd. tê kirin, li ser sînoran astengî derdixin ku gelê Bakur û Rojhilatê Sûriyeyê bi birçîbûnê rû bi rû bimîne. Lê mixabin dewleta Tirk bi navê ewlehiyê deriyê Murşîtpinarê yê ku diçe Kobanê girtiye û nahêlin alîkarî ji gelê Rojava re biçe.”
“Tev şirîkên şer in”
Di berdewama axaftina xwe de Alî Karadogan bal kişand ser êriş û astengiyên bi hevkarî tên kirin û wiha pê de çû: “Li ku derê mafên mirovan bê binpêkirin em qebûl nakin. Ev nêzîkî mehekê ye gelê Rojava di bin şert û mercên zehmet de dijîn. Gelek kes di nava van şert û mercên giran de jiyana xwe ji dest dane. Di nava van şeran de bi tenê leşker jiyana xwe ji dest nadin, welatiyên sivîl jî bi qasî wan jiyana xwe ji dest didin. Dewletên weke Amerîka, Ingîlîstan, Rusya û Fransa tişta ku li Rojava didin meşandin, tev şirîkên şerê heyî ne. Bi taybetî jî divê dewleta Tirk bi awayekî erênî nêzîkî vê pêvajoyê bibe.”
‘Kurdên li bakur û Rojava xizmên hev in’
Alî Karadogan di berdewama axaftina xwe de diyar kir ku li Rojava ji xeynî Kurdan Ermen, Çerkez û Suryan jî hene. Karadogan got ku piraniya gelê li wê derê Kurd in û wiha pêde çû: “Kurd ên li Rojava xizmên Kurdên li Bakur in yên Bakur jî xizmên wan in. Zextên ku li ser Kurdên Rojava tê kirin dilê Kurdên Bakur diêşê. Li Tirkiyeyê jî pêvajoyek hatiye destpêkirin. Ev 40-50 sal in li Kurdistanê bê navber şerekî dijwar diqewime. Ji bo ku destkeftiyên Kurdên Rojava ji destê wan bistînin, her tiştî dikin. Em dixwazin dewleta Tirk vê pêvajoya ku hatiye destpêkirin baş bimeşîne û di encamê de tiştekî baş derbikeve holê. Divê bi vî awayî bi neyartî li gelê Kurd nenêrin. Em zanin ku bandora rêveberiya Tirkiyeyê li ser Hukûmeta Suriyeyê jî heye. Em dixwazin li hemû herêman têkiliyên gelan bi hev re çêbibin.”
‘Divê ji vir şûn ve xebat û çalakî baş bin’
Di dawiya axaftina xwe de Alî Karadogan anî ziman ku di demên dawî de li hevhatinek di navbera HSDê û hukûmeta demkî ya Şamê de çêbûye û got: “Ev peyman ji bo sekinandina şer û pêşîlêgirtina kuştinê gelek baş e. Divê dewletên derve jî bandorê li ser van peymanan nekin. Jixwe piraniya gelên ku li wir dijîn jî gelê Kurd û Ereb in. Her wiha di nava axa Sûriyeyê de gelek gelên cuda jî hene û divê mafên wan jî li ber çavan bê girtin. Weke parêzvanên mafên mirovan em erênî li vê peymanê dinêrin. Destpêk nebaş be jî divê ji vir û şûn ve xebat û çalakî baş bibin. Destkeftinên ku hatine bidestxistin divê ji holê neyên rakirin. Û divê ji vir şûnde bi awayekî fermî Kurd jî di zagonên Sûriyeyê de cih bigirin.”
