Parlemanterê Meclîsê Neteweyîye yê SPO’yî Paul Stich ke vat “Aştîya raştikêne, tena wexto ke seba herkesî cuyêka biewle û rûmetine mumkin a, temîn bena”, bale ant ke Sûrîye de çareserîyêka ke kurdan û kêmnetewan teber ra verdana, nêeşkena biba menda.
Parlemanterê Meclîsê Neteweyî yê SPO’yî Paul Stichî derheqê rewşa peyêne de erjnayîşî kerdî û îfade kerd ke mesela kurdan heme cuya ey a sîyasî de her tim vernîya ey de bîya.
‘Bê îradeyê kurdan Sûrîye de aştî temîn nêbena’
Stichî ke derheqê peymane de qisey kerd, îfade kerd hem dostanê kurdan ra hem zî grûbanê etnîk ê cîya-cîyayanê Sûrîye ra peyamê ke yenê kerdene, atmosferêko bêbawerî nîşan danê. Stichî dîyar kerd ke badê rejîmê Esadî eke dewro newe heme grûbanê etnîkan û komelkîyan bigîro xo mîyan manaya azadbîya raştikêne dano û vat: “Eke azadîye tena seba beşêkî est a, na azadîye nîya.” Stichî bale ante ke qerarê derheqê ameyoxê kurdan de nêeşkenê bê îradeyê kurdan bêrê girewtene.
‘Vengdayîşê Ocalanî gama muhîm a’
Paul Stichî ke gama Rayberê Şarê Kurdî Abdullah Ocalanî ya aştî erjnaye, dîyar kerd ke no vengdayîş averşîyayîşêko zaf muhîm û pozîtîf o û vat ke o hêvîdar o ke na game destpêkê prosesê aştî biba ke raşta zî nameyê xo heq keno.
Sewbîna Stichî bale ant ke serkewtişê nê prosesî girêdayeyê hîrê şertanê bingeyinan o: Yewin, aşt tena wexto ke heqê şarê kurdî bêrê naskerdene û kes nêbo hemwelatîyê sînifa dîyîne mumkin a. Dîyin, zelal nîyo ke dormeyê îqtîdarê muhefezekar û raştgirê Tirkîya nê prosesê senî cidî gênê. Hîrêyin, muhelefetê Tirkîya ganî parçe nêbo û bi taybetî CHP ganî nê prosesî de rolêko awankar bigîro xo ser.
‘Lîsteya terorî ra Vetişê PKK’yî netîceya xozayî ya’
Stichî îfade kerd ke Sûrîye de bi temînbîyayîşê aştî, garantîya heqanê kurdan ê Vakurê Sûrîye de û Tirkîya de cuya prosesê aştîya raştikêne, ganî PKK lîsteya terorî ya Yewîya Ewropa ra bivejîyo. Ey bale ante ke no, netîceyo xozayî yê ronayîşê aştîya şênber û domdar o.
‘Heqê şarê Rojava yenê pawitene’
Stichî vat: “Aştîya raştikêne, tena wexto ke seba herkesî cuyêka biewle û rûmetine mumkin ba, temîn bena. Çareserîyêka Sûrîye de ke kurdan û kêmnetewanê bînan teber ra verdana, nêeşkena biba menda.”
