Rixmê peyman û adirbestî zî rîyê dorpêço giran ê Kobanî ser o rewşa merdimî her ke şona giranêr bena. Hetêk ra hukmatê demkî û heto bînî ra Tirkîya vernîya vîyartişê hetkarîyanê heyatî astengîyan vejenê.
Grûbanê hukmatê demkî yê Sûrîye 16 rojî yo dorpêçêko giran dayo Kobanî ser o û cuya zafêrê 600 hezar kesan tehluke de ya. Bi taybetî dermanî nêyenê peydakerdene, şitê gedeyan û xida bazaran de xeylê kêmî bîye. Rîyê birnayîşê elektrîkî ra beşê nêweşxaneyan vindertê û madeyê sotemenî û lazimtîyê bîn ê heyatî zî nêyenê peydakerdene.
Tirkîya qedexeyê vîyartişê hetkarî domnena
Goreyê peymana 30ê çeleyî ya mabênê HSD û hukmatê demkî ganî dorpêçê Kobanî ser o biameyêne hewanayene. Rixmê na peymane û adirbestî zî dorpêç hema zî dewam keno. Heto bîn ra dewleta tirkan zî eyn polîtîka domnena û paştî dana hukmatê demkî. Hewteyêk o hetkarîya ke vakurê Kurdîstanî ra ameya erşawitene, sînor ser o yena vindarnayene.
