Hemverfekê Demî yê MîA-FED’î Îlhan Tanî dîyar kerd ke Rojava de vera kurdan suc ame kerdene û wina vat: “Bedenê cinî sey xenîmetî vînenê, sivîlî ameyê înfazkerdene. Nê sucî vera Îslamî yê.”
Federasyonê Cigêrayîşanê Îslamî yê Mezopotamya (MÎA-FED) derheqê dorpêç û krîzê însanî yê Rojava û qetlîamê rejîmî Îranî yê vera şarê rojhêlatê Kurdîstanî de, cehdeyê Cumhurîyetî yê Agirî ser o eşkerayî daye. Hemverfekê Demî yê MÎA-FED’î Îlhan Tanî çalakî de qisey kerd û hêrişê vera kurdan sey sucê vera Îslamî erjna.
‘Kobanî de şer nê zulm est o’
Tanî dîyar kerd ke rixmê sozê vindertişê şerê Rojava zî dorpêçê serê Kobanî dewam keno û vist vîrî ke destûr nêyeno dayene ke şaristanî rê hetkarî bêra erşawitene. Tanî vat: “Cehdê terbîyekerdene şarêkî yê bi rayîrê vêşanî û bêdermanî, vera huqûqê şerî yo û tena eşkeno bi zulm bêro pênasekerdene. Ma, DAIŞ, HTŞ û grûbanê cîhadîstan qirkerdişanê înan ê verênan ra nas kenê. Bedenê cinî sey xenîmet vînenê, sivîlan înfaz kenê. No sucê vera îslamî yo.”
‘Distandartî goreyê exlaqê Quranî nîyo’
Dewamê qiseykerdişê xo de Tanî distandartîya komelê mîyanneteweyî û derûdoranê dînî vera problemê kurdan rexne kerd û vat: “Ê yê ke seba Arakan, Rojhêlatê Tirkîstanî û Filîstîn vejîyenê meydanan, wextêko babete bena kurdê Rojava û Rojhelat xo bêveng kenê. Na bêvengî nêyena qebulkerdene. Ziwan û nasname ayetê homayî yê û çinhesibnayîşê înan, înkarkerdişê Homayî yo.”
Vengdayîşê akerdena korîdorê însanî
Tanî vengda ke seba hetkarîya Kobanî ya bilez ganî Berê Sînor ê Kobanî bêrê akerdene û korîdorê hetkarîya însanî bêro akerdene. Tanî waşt ke teda, înfaz û dardekerdişê Rojhelatê Kurdîstan û Îranî bêrê vindarnayene û vat: “Vera zaliman ma mazluman reyde yê. Yê ke vera zulmî bêveng manenê, şeytanê bêziwan ê.”
