Amed – Konferansê MÎA-FEDî roja dîyine de dewam keno. Delegeya MÎA-FEDî Nesîbe Kaya bale ante serê têkoşînê cinîyan û vat: “Şehîda verêne ya Îslamî Sumeyye bint Habbat ra heta Dayîkanê Aştî têkoşîn dewam keno.”
Federasyonê Cigêrayîşanê Îslamî yê Mezopotamya (MÎA-FED) bi şîarê “Îslamo Demokratîk: Bawerî de zerrî ra, komelî de azadî” Salona Alî Emîrî yê Şaredarîya Şaristanê Girdî yê Amedî de konferansê xo yo gird roja dîyine de dewam keno.
Meclîsê Dayîkanê Aştî, endam û rayberê partîyanê polîtîkan, aktîvîstê TJA, temsîlkarê dezgeyanê sivîlan, rayber û endamê MÎA-FEDî û xeylê kesî tewrê konferansî bîyî. Roniştişê hîreyine bi moderatîya Rumeysa Gulmezî dest pê kerd. Babatê “Îslam de cinî”, “Îslam de rolê cinî yo komelkî û ruhê xoverdayîşî” û “Dîn û Ziwan” ameyî nîqaşkerdiş. Rajaa Hamîd serê “Îslam de cinî”, delegeya MÎA-FEDî Nesîbe Kaya “Îslam de rolê cinî û ruhê xoverdayîşî”, Mele Seyfettîn Tunç zî serê babeta “Dîn û Ziwan”î vindertî û erjnayîşî kerdî.
‘Quran heqanê cinîyan û paweno garantî keno’
Rajaa Hamîd ard ziwan ke meseleya cinîyan seba rol û berpirsîyarîyanê komelkî babetêka muhîm a û wina vat: “Îslam wextê de wina de ame ke cinîyan tede xeylê zehmetî antêne. Ê wextÎ de Îslamî wina îmkanî pêşkêşê cinîyan kerdî ke nêameyene xeyal kerdene. Îslam babeta cinîyan de şorişêko ferasetî yê bingeyîn viraşto, sozê edalet û seypêyî dayo. Quran temsîlkarê heqanê cinîyan kerda. Wextanê verênan ê Îslamî de cinîyan bi xo tewrê perwerdeyî bîyê û xizmetê zanistî kerdê. Quranê Pîrozî qebul kena ke cinî wayîrê mulkbîyayîşê serbestî ya. Îslamî pawitişê cinîyan û heqê înan kerdê garantî. Ganî Qurane û cayê cinîyan rast bêro fehmkerdiş.”
‘Şehîda verêne ya Îslamî Sumeyye bint Habbat a’
Delegeya MÎA-FEDî Nesîbe Kaya dîyar kerd ke vateyê ‘Cinî eke werd viraza, keye de biewnîyo, do şêro cenet’ rast nîyo û wina dewam kerd: “Rastîya Îslamî resena Medîne vejîye werte ke rastî na nîya. Ayet û hadîsan de nîno waştiş ke cinîyî mîyanê komelî de bê. Şehîda verêne ya Îslamî, cinîyeka ke bi rojan îşkence dîyo, Sumeyye bint Habbat a. Wayîrê keyeyêka gird û dewlemende nêbî, cinîyeka kole bî la çi rey doza xo ra fek nêverda û bîy şehîda verêne ya Îslamî. Îslam de cinî mêrdeyan ra verê bîya şehîd. Cinî bi îlm û zanayîya xo zî têkoşîn kerdo.”
‘Sumeyye bint Habbat ra heta Dayîkanê Aştî têkoşîn dewam keno’
Nesîbe Kaya dewamê qiseykerdişê xo de dîyar kerd ke cinî Îslam de wayîrê îradeyî ya, tu kes nêeşkeno îradeyê cinî bişikno û vat: “Cinîyê ewroyî Afganîstan de vera îdeolojîya ke bi nameyê dînî yenê kerdene, xover danê. Cinîyê ma yê lehengî zaf ê, mîsalê tewr baş Leyla Qasim a. Aye zî zanayêne do bêro daliqnayene û kîştene la aye seba doza xo û rûmetê xo şehîd kewte. Ma şexsê Jîna Amînî de dî ke ‘Jin Jiyan Azadî’ heme top û tankanê înan ra girdêr o.
Tarîx ra heta ewro ma bi nê cinîyanê têkoşeran serfîraz ê. Sumeyye bint Habbat ra heta dayîkanê aştî no têkoşîn dewam keno, ma verê nê têkoşînê dayîkanê xo de bi hurmet ê.”
‘Dîn bi rayîrê ziwanî xo resneno şarî’
Hevserokê MÎA-FEDî Dr. Abdullah Sagirî bale ante serê têkilîya ziwan û dînî û vat: “Seba vila bîyayîşê peyamanê Heqî, ganî yan ziwanê heme dinya bibo Erebkî ke no raşt nîyo, yan zî ganî Qurane seba heme ziwananê dinya bêro açarnayene. Nê ziwanan ra yew zî ganî kurdkî bo. Ganî hurmet seba heme ziwanan bibo. Ewro ra tepîya, ma heme mesajanê xo bi ziwanê şarê xo bîyarê ca. Ziwanê dayîke seba ma nîmetêko gird o. Ewro no wezîfe kewt serê milanê ma. Doman û tornanê xo de bi kurdkî qisey bikerê. Dîn û ziwan pê ra girêdayê yê. Dîn, mesajê xo bi rayîrê ziwanî resneno şarî.”
Badê qismê pers û cewaban de roniştişê verê nêmrojî qedîya. Konferans do bi roniştişê dimayê nêmrojî biqedîyo.
