Dayîkanê Şemeyî çalakîya xo ya 1090.de aqubeta Ridvan Karakoçî ê ke serra 1994î de amebî vîndîkerdiş û qetilkerdene persayê.
Dayîkê Şemeyî bi waştişê vîndîbîyayî bêrê vînayene, kiştoxî bêrê muhakemekerdene hewteyo 1090. de meydanê Galatasarayî de çalakîya xo ya hewteyî kerde. Dayîkanê Şemeyî, rayberê ÎHD’yî yê Stenbolî, temsîlkarê partîyane sîyasî û sazgehê komelî û xeylê kesî tewrê çalakî bîyê. Çalakî de fotografê vîndîbîyeyan ameyê girewtene.
Dayîkê Şemeyî no hewte de aqûbetê Ridvan Karakoçî persayê. Metnê eşkerayî merdima şemeyî Besna Tosunî wend.
‘Qedexeyê Meydanê Galatasarayî wa bêro wedaritene’
Besna Tosun dîyar kerd ke ê çalakîya 1090. de veng danê Wezaretê Karê Zereyî yê newe Murat Çîftçî û wina vat: “Karê Wezaretî caardişê serûberîya pêroyî yo û no zî bi pawitişê heqanê bingeyin û azadîyan mumkun o. Ganî bilez qedexeyê Meydanê Galatsarayî ser o bêro wedaritene. Gureyê dewlete bêvengkerdişê merdimanê vîndîbîyayeyan nîyo, pawitena heqê peydakerdişê vîndîbîyayeyan o.”
Polîs: Ridvan bîyarê nêke ma do ey bikişê
Dewamê qiseykerdişê xo de Besna Tosun îfade kerd ke Ridvan Karakoç 31 serre bi û Stenbol de cuya xo ramitene, derheqê vîndîkerdene ey de nê çîyî vat: “Mîyanê rêxistinanê kultur û partîyanê sîyasî de ca girewtene. Serra 1994î de seba îfadeyê kesêke derheqê Ridvan Karakoçî de qerarê destbendkerdene amebî dayene. Polîsî kewtbî pey Ridvanî û keyeyê ey ra vatbi ke, ‘Ridvanî ma rê bîyarê nêke ma ey ça de bivînê ma do ey bikişê’ Têkilîya Ridvanî heta 15ê sibate 1995î keyeyî reyde dewam kerd. La dimayê 15ê sibate keyeyê ey êdî tu xebere tira nêgirewte.”
‘No 31 serrî yo cipersayîşêko cidî nêameyo kerdene’
Besna Tosun dîyar kerd ke keyeyê Karakoçî seba aqûbetê Ridvanî bizanê şîyê fekê hemê beran û qiseykerdişê xo wina qedêna: “La cigêrayîşê keyeyî ra tu netîce nêvejîya. Her kesî eynî çî keyeyî ra vatêne, ‘ma het de nîyo.’ Badê cigerayîşê 110 rojan cenazaya Ridvan Karakoç ê ke ci r3e îşkence amebî kerdene, Goristanê Bêkesan yê Altinşehîrî de ame vînayene. Her çend keyeyê Ridvan Karakoçî gêrayênê zî sazgehanê fermî cenazaya ey Tiba Edlî de vindarnaybî û seke ‘nasname dîyar nîyo’ definkerdbi. No 31 serrî yo cipersayîşêko tesîrdar nêameyo kerdene. Ma hewteyê 1090. de vengdayîşê berpirsîyaran kenê ke ganî bilez dosyaya Ridvan Karakoçî de cipersayîşêko baş bêro kerdene. Çend serrî derbas bibê zî ma do aqûbetê heme vîndîbîyayan bipersê.”
‘Ma têkoşînê xo ra veranêdanê ’
Birayê Ridvan Karakoç Hasan Karakoç qisey kerd ke no 31 serrî yo birayê ey vîndîbîyaye yo û wina vat: “Tena ma nê, des hezar kesî ewro aqûbetê merdimanê xo persenê. La vengê ma nêame eşnawitiş. Dosya zî badê 30 serran ameye girewtene. Hezar serrî zî derbas bibê do têkoşînê ma dewam bikero. Ma têkoşînê xo ra fek veranêdanê.”
‘Aqûbetê vîndîbîyayan yeno nimitene’
Peynîyê çalakî de avûkata Ridvan Karakoçî Eren Keskîn qisey kerd û wina vat: “Ridvan her wext şarê xo reyde bî. Rojêk vat, ‘pey mi de yê, eke ez to nêgêra bizane ke ez berda.’ Rojêk nêgêra ma fam kerd ke Ridvan berdo. Sîstemêk est o û bi nê sîstemî aqubetê kesê ke destbendkerde yê û ameyê vindîkerdene yeno nimitene. Aqûbetê Ridvanî zî wina bi.”
Beşdarê çalakî badê ke qerenfîlî ronayê Meydanê Galatasarayî çalakîya xo qedênaye.
