Dayîkanê Şemeyî, hewteyo 1103. de aqûbetê Kasim Alpsoyî û faîlê Halîl Alpsoyî ê ke 32 serrî verêcû ameybî destbendkerdene, persayê.
Dayîkanê Şemeyê bi waştişê ‘vîndîbîyayî bêrê vînayene, kiştoxî bêrê muhakemekerdene’ hewteyo 1103. de meydanê Galatasarayî de çalakîya xo ya hewteyî kerde. Dayîkanê Şemeyî, endam û rayberê ÎHD’yî yê Stenbolî û xeylê kesî beşdarê çalakîye bîyê. Çalakî de fotografê vîndîbîyeyan û Dayîkê Şemeyê ke cuya xo ra bîyî ameyê girewtene. Hewteyo 1103. de aqûbetê Kasim Alpsoy ame persayene û ame waştene ke faîlê Halîl Alpsoyî bêro muhakemekerdene.
Her di şehîdî 32 serrî verêcû ameybî destbendkerdene û vîndîbîyayene. Halîl Alpsoy ame vînayene la tu xebere Kasim Alpsoyî ra nêame girewtne.
Eşkerayîye hetê Endama Komîsyonê Vîndîbîyayeyan ê ÎHD’yî Stenbolî Zeynep Yildize ra ame wendiş.
Hîkayeyê di datîzayan
Zeynep Yildize aqûbetê Kasim û Halîl Alpsoyî ke 32 serrî verêcû ameyê destbendkerdene û vîndîbîyayene persa û vat: “Ma veng danê Serekê Daîreya Cigêrayîşê yê Faîlanê Nedîyaran ya ke bin banê Wezaretê Edaletî de ameyo awankerdene û ma vanê; ‘hadîseyê ke nêameyê cezakerdene zî binpaykerdişê heqanê merdimîye yê’. Ewro ma aqûbetê Kasim Alpsoyî û Halîl Alpsoyî ke 32 serrî verêcû ameyê destbendkerdene persenê. Halîl Alpsoy 12ê Gulana 1994î de bi cinîya xo û gedeyê xo yo ke 40 roje bi, demo ke Stenbolî ra agêreno keyeyê xo, hetê polîsan ra ame destbendkerdene. Cinîya Halîl vera polîsan vinderta la polîsan aye ra vato, ‘do 30 deqîqeyan dima agêro keye’. La Halîl êdî nêagêreno. Badê 18 rojan cenazeyê Halîl Alpsoy ke bi îşkence ameybi kiştene, Kirikale de daristanêke de ame vînayene. Badê hewteyêk datîzayê Halîlî, Kasim Alpsoy zî 18ê Gulana 1994î de Adan de ame destbendkerdene la eynî roj ame veradayene. La polîsan dest da nasnameya Kasim ser û vat: ‘siba bêre nasnameya xo bigêre’. Dima ra Kasim bi merdimêk xo reyde şino awahîya MIT’î la nêvejîyeno. A roje ra heta ewro aqûbetê Kasim Alpsoyî nêame eşkerakerdene. Çend serrî derbas benê wa bibê ma do aqûbetê kesanê vîndîbîyayeyan bipersê.”
Beşdarê çalakî badê ke qerenfîlî ronayê Meydanê Galatasarayî çalakîya xo qedênaye.
