Serekê Amerîka Donald Trumpî eşkera kerd ke o do bi xo nerasterast beşdarê kombîyayîşanê peymana nukleerî bibo û vat: “Beno ke Tehran derheqê mesela de peymanêk bikero.”
Donald Trumpî derheqê kombîyayîşê ewroyî yê Cenevreyî de ke seba bernameyê nukleerî yê Îranî yeno kerdene, rojnamegeran rê qisey kerd.
Trumpî dîyar kerd ke o do bi xo nerasterast beşdarê kombîyayîşî bibo. Trumpî ard ziwan ke o bawer keno ke Tehran wazeno derheqê mesele de peymane bikero. Goreyê xebera Reutersî; selahîyetdaranê Amerîka zî vato ke eke kombîyayîş serkewte nêbo artêşa Amerîka xo seba şerêkê demdergî yê vera Îranî hazir kena.
Serekê Amerîka Trumpî mîyanê teyaraya Air Force Oneî de derheqê mesele de rojnamegeran rê qisey kerd. Trumpî rojnamegeran rê vat ke o do nerasterast beşdarê nê kombîyayîşan bibo û no zaf muhîm o.
Verê kombîyayîşî tansîyon zî roje bi roje berz beno. Artêşa Amerîka keştîyêka bîne ya teyarayanê şerî herême de bi ca kerde. Selahîyetdarê amerîkayijî ke Reutersî rê qisey kerd dîyar kerd ke eke kombîyayîş serkewte nêbo ê xo seba şerêkê vera Îranî hazir kenê.
Trumpî cewabê persa “viraştişê peymane mumkun o?” de wina vat: “Îran muzakereyanê huşkan wazeno. La badê ke Amerîka hamnanê serra vîyarte tesîsatê nukleerî yê Îranî bombardûman kerd, Îranî netîceya nê muzakereyanê xo yê huşkan zî dî.”
Îran zî 16ê sibate 2026î de Kendava Hurmuzî de tatbîkatêko leşkerî virazeno. Zaf çimeyan dîyar kerd ke Îranî bi nê tatbîkatî waşto ke tesîrê xo kombîyayîşê Cenevreyî ser o ke do ewro bibo, zêde bikero.
