Beser Kûlbag ke dewa Tûlûk de weşîya xo ramnena, 94î de wexto ke dewlete dewa Tûlûk kerde tal, bonî ke vesnayê, cîranê xo bar kerde şîye. Dewa xo de teyna menda. Wisar sona dewa xo payîz yena Mamekîye hetê kênaya xo. Ju lazê xo ko de ameyo kiştene. Dez û heşîrîye ser zaf dîya û vana: “Laze mî şi hardê dewrêş ûnca kî aştîye wazena.”
Beser Kûlbag, weşîya xo dewa Tûlûk de ramnena. Tûlûk girêdayîya Dêrsimî ya. 94î de dewî ke yenê veşnayene, dewa xo canêverdana. Lazê xo ke ameyo kiştene, a roje ra naver, dewa xo ra dûr nêmanena. Beser Kûlbag ajansê ma rê 94î ra tepa serebûtanê xo ser o qisey kerd.
‘Aştî jîyar û dîyar ser bêro’
Beser Kûlbag, verî behsê 94î kena û wina vana: “Esker ma ra va ke barkerê şêre. Ma ne şîyayme. Laze mî koye de ame kîştene. Ma zaf îşkence dî. Male ma da kûtkû. Laze mî kîşîya, ma ra vatene ‘terorîst’. Ma vile xo çewt nekerd. Înû sekerd ke ma dewa xo ra nêşîyê. Zaf neçarîye dîme. Ma re xeber vatene. Mi mezela lazê xo canêverdaye. Vêsan vindon, mezela lazê xo, dewa xo teyna nêverdon. Ma sima ra nêtersenîme. Cîranê ma bar kerd şî, ma nêşîme. Teyna dewa xo de mendîme. Dormê ma esker gûret bî. Ma rê zaf îşkence kerd. Towa ne ardene dewa xo. Vesanîye xo ra soltike potêne. Seveta domananê koyî nûn potene ke vêsan nêmanê. Nika bîyîme kokim, verê coy, mal kerdêne weyî, qa kerdene weyî. Bîjeke ma bî. Zimistan yeno şona çena xo, ûsar son dewa xo.”
“Ma zaf heşîrîye dî”
Beser Kûlbag, heşîrîye dîyane ser qiseykerdişê xo yê peyênî de wina vana: “Esker ame, sere şîvîng ser de nîştene ro. Qayte ci kerdêne, kam yeno dewa ma kam sono. Her cayê ma saye kerdêne. Wazenîme aştî bêra. Gencan rê gûnek o. Na jîyar dîyar aştîye bîyaro. Mînetê mi nawa.”
