Meclîsê Cinîyan ê DBP’yî deklarayonê 8ê Adare eşkera kerd û dîyar kerd ke 8ê Adare sebebê têkoşîn û îlankerdişê îradeyê înan ê awankerdişê cuya newîye yo.
Meclîsê Cinîyan ê Partîya Herêman a Demokratîke (DBP) bi beşdarîya Hemsereka Pêroyî ya DBP’yî Çîgdem Kilîçgun Uçar deklarasyonê 8ê Adare Roja Cinîyan a Dinya bi sloganê “Bi cinîya azade ver bi komelêko demokratîk” eşkera kerd. Endamê meclîsê cinîyan û endamê TJA’yî beşdarê deklarasyonî bîyê ke awanîya DBP’yî ya Mûşî de ame eşkerakerdene.
Metnê eşkerayî tena bi lehçeya kurmancî, hetê verfeka Meclîsê Cinîyan ê DBP’yî ra ame wendene.
Eşkerayî de ame vatene ke 8ê Adare tena rojêka tarîxî ya vîrardişî nîya; eynî wext de zehmet û bedêlanê hezar serran ê cinîyan, mîrasê xoverdayîşê cinîyanê pêşengan, daraxê rêxistinbîyayîş û pêşnîyazê paradîgmaya komelê demokratîkî, cuya ekolojîke û cinîya azade ard vîr.
‘Her roje bi seyan cinî destê camêrdan ra yenê kiştene’
Ame vatene ke hêrişê ke sesera 21. de vera cinîyan yenê kerdene asayî nîyê, sey netîceyê sîstemê serdestîya camêrdan o rêxistinkerde ra yenê kerdene. Goreyê raporanê fermî û serbestan her roje bi seyan cinî destê camêrdan ra yenê kiştene û binê nameyê “şikdarî” de kiştişê cinîyan yenê kerdene.
‘Hêrişê vera şorişê cinîyan bi piştîdayîşêko gird ameyê puçkerdene’
Ame vatene ke şorîşo ke Rojava de bi pêşengîya cinîyan vejîya meydan, raştîyêk nîşan dano ke şarê dinya eşkenê pîya bi hewayêko seypê û azad biciwîyê. Heme hêrişê ke vera şoreşê cinîyan ê Rojava ameyê kerdene, çar hetanê Kurdîstan de û dinya de bi xoverdayîş û piştîdayîşêko gird cewabê înan ame dayene.
‘Prosesê Aştî û Komelê Demokratîkî’
Ame vatene ke bi vengdayîşê “Aştî û Komelê Demokratîkî” yo ke Rayberê Şarê Kurdî Abdullah Ocalanî 27ê sibata 2025î de kerd, prosesêko newe dest pêkerd. No proses seba şaran û cinîyan bingeyêko sîyasî yo newe awan kerd û wina dewam kerd: “Aştî tena bêvengkerdişê çekan nîyo. Aştî pawitişê heqanê cinîyan, ewlekerdişê cuya cinîyan û averberdişê hemwelatîya seypê û azade yo. Seba ke proses bi serkewtiş bireso netîce, seba ke Birêz Abdullah Ocalan azad bibo û seba ke komelê demokratîkî bi gamanê şênber bêro awankerdene ma do têkoşînê xo bidomnê.”
‘8ê adare seba ma sebebê têkoşînî yo’
Peynîya eşkerayî de wina ame vatene: “Yewîya Neteweyî ya Cinîyan meselaya tewr stratejîke ya nê serdemî ya. Yewîya cinîyan a ke nasname, bawerî, kultur û şaranê cîya-cîyayan ra yeno pê, hemverê sîyasetê îşxalker û şerî cewabo tewr bihêz o. 8ê adare de ma reyna îlan kenê: Xoverdayîşê ma çend gird bibo, azadîye zî do hende vila biba. Ma venga heme cinîyan sere de cinîyanê Kurdîstan û Rojhelatê Mîyanênî danê ke bêrê têkoşîno hempar, xoverdayîş û rêxistinbîyayîşê xo girdêr bikerê.”
