Platformê Kede û Demokrasî yê Dêrsimî seba 21ê Sibate Roja Ziwanê Dayike ya Dinya Kûçeyê Hunerî de eşkerayî daye. Eşkerayî de ame dîyarkerdene ke zon bêwayîrîye nêbeno, wayîr vejîme.
Platformê Kede û Demokrasî yê Dêrsimî bi munasebetê 21ê Sibate Roja Ziwanê Dayike ya Dinya Kûçeyê Hunerî yê Dêrsimî de eşkerayî daye. Hemşaredarê Dêrsimî Bîrsen Orhan û Cevdet Konak, Parlamentera DEM Partî ya Dêrsimî Ayten Kordu, Hemserekê Platformê Ked û Demokrasî Ozcan Ateş û xeylê welatijî beşdarê eşkerayî bîyê. Eşkerayî de pankarto ke ser de “Zonê ma weşîya ma wa, weşîya xo rê bivejîme” nuştebi, ame girewtene. Metnê eşkerayî hetê Ozcan Ateşî ra ame wendene.
‘Komele Demokratîk de zon înkar nêbeno’
Ozcan Ateşî, qiseykerdîşe xo de wina va: “Aştîye bê zon nêbena. Qomo ke zone xo ra vîsna, tarîxê xo, kamîye xo, raştîya xo, xo vîr ra keno. Beno dûr, dima ra beno vîndî sono. Polîtîkayê Dewlete Kirmancîye ser o zorderîye keno. Înkar û asîmîlasyon nêqedîno. Tirkîya de, eve înkar xeylê zonî bîyê vîndî. Teyna Kirmanckî nîya, Lazkî yo, Hemşînkî yo, perûne beno vîndî sono. Komelo Demokratîkî de înkar nêbeno.”
‘Bêrê pîya kilîtê zonê xo yakerîme’
Ozcan Ateş, wayîrvejîyane zonî ser o qisey kerd û wina va: “Vatene ma o yo ke êdî înkar biqedîyo. Qomê ma, zonê xo qisey bikero. Zono ke zereyê qomî de qisey nêbi, vîndî beno sono. Zonê ma bîgîrê binê qanûnî. Bêrê pîya kilîtê zonê xo yakerîme. Bê zon weşîye nêbena. Zonê ma roje bi roje beno vîndî. Zere çe xo de, domananê xo de, embazanê xo de, her ca de zonê xo qisey bikerê. Kam ke zonê xo qisey nekerd, rêça xo vîndî beno sono.”
