Badê eşkerayîyanê Wezîrê Karê Teberî yê Tirkîya Hakan Fîdanî hereketê artêşa Iraqî yê warê Şingalî de zaf zêdê bîyê. Noqteyê kontrolê neweyî yenê viraştene û demêk de ke talûkeyê Şingalî zêdeyêr o, kampanyaya bêçekkerdişî da destpêkerdene. No seba pawitişê Şingalî nîyo, yeno waştene ke Şingalî bêpawitiş verdo.
Vîrê tarîxî yê komelê êzîdîyan zaf gandar o: 1973-74î de Seddam Huseyîn bêçekkerdişî ra dima êzîdîyî kampanê “mucemmeh” de bi ca kerdbî. Verê fermanê 2014î de zî KDP û artêşa Iraqî wesayîtê pawitişî destê êzîdîyan ra girewtbî.
Gamê ke dewleta tirke mecbûr kena û Iraq zî bi qismêk qebul keno; bêçekkerdişê YBŞ-YJŞ û Asayîşî, vilakerdişê hêzanê pawitişî û bêpawitişverdayîşê Şingalî; eke wina bibo rayîr abeno ke sazgehê demokratîkê ke fermanî ra dima bi zehmet û bedêlanê giranan awan bîyî zî do bêrê vilakerdene.
Eynî wext de çalakîyê MÎT’î herême de xurttêr bîyê; bi telefonan merdiman rê ke sazgehanê Îdareyê Otonomî de xebitênê, pêşnîyaz û mecbûrkerdişê ajantîye kenê. Medyaya şerê taybetî ra zî xebatê psikolojîkî yenê kerdene; sey vilakerdişê resimêk ke bi zîrekîya viraştîye virazîyayo ke vanê artêşa tirke Koye Şingalî ra bi ca bîya.
Hemverê heme tehdid û kayan komelê êzîdîyan tepşê xoverdayîşî û qerardarîye ra fek nêverdano: “Ma êdî êzîdîyê ê wextan nîyê ke bêpawitiş û bêrêxistine bîyî.” Îdareyê Otonom ê Şingalî zî seba pûçkerdişê planê dewleta tirke, dewleta Iraqî reyde dîyalog û muzakereyanê çareserkerdişî wazena.
Seke Rayber Apoyî zî vato: “Qirkerdişê êzîdîyan ra, ver bi ronesansê êzîdîyan şino.”
