Platforma Saziyên Demokratîk, bi boneya salvegera Komploya Navneteweyî ya 9ê Cotmehê ya li dijî Rêberê Gelê Kurd Abdullah Ocalan hatiye pêkanîn, daxuyaniyek da û diyar kir ku Abdullah Ocalan bi berxwedana xwe ya Îmraliyê komplo pûç kiriye.
Platforma Saziyên Demokratîk a Wanê, bi boneya salvegera Komploya Navneteweyî ya 9ê Cotmeha 1998an a li dijî Rêberê Gelê Kurd Abdullah Ocalan hatiye pêkanîn, li ber Wan AVMê daxuyaniyek da. Girse, li ber AVMê kom bû û xwest bimeşe, lê polîsan bi hinceta “qedexeya walitiyê” nehişt girse bimeşe. Girseyê bertek nîşanî vê pêkanînê da û ji bo 5 deqeyan çalakiya rûniştinê pêk anî. Piştre cihê ku lê kom bûne daxuyanî dan û pankarta “bi rêbertiya azad ber bi civaka azad ve” vekirin. Girseyê dirûşmeyên “bê serok jiyan nabe” û “bijî serok apo” berz kirin. Tevî nûner û endamên saziyên demokratîk, endam û rêveberên Partiya Wekhevî û Demokrasiyê ya Gelan (DEM Partî) û Partiya Herêmên Demokratîk (DBP) û gelek kes tev li daxuyaniyê bûn.
‘Abdullah Ocalan komplo bi berxwedana xwe pûç kir’
Rêveberê DBPê Emîn Kûtas metna daxuyaniyê xwend û da zanîn ku 9ê Cotmeha 1998an, ne tenê destpêka komployeke navneteweyî ye ku li dijî Abdullah Ocalan hatibû plankirin, di heman demê de mîladek e ji bo êrîşeke berfireh a li dijî hêviyên aştiyê yên gelên Kurdistanê û Rojhilata Navîn. Emîn Kûtas, anî ziman ku ev komplo, operasyoneke navneteweyî bû ku li dijî îradeya azadiyê ya gelê Kurd, li dijî ramaneke ku dikaribû di Rojhilata Navîn de bibe pêşengê veguherîna demokratîk, hatibû plankirin û got: “Ji ber ku raman û paradîgmaya ku Brez Ocalan pêş xistibû, li hemberî sîstema şer, îstîsmar û serdestiyê ku gelan rû bi rû dihêle, bi perspektîfa Kurdistana Azad û Rojhilata Navîn a Demokratîk, derketineke aştiyê bû. Navendên Modernîteya Kapîtalîst xwestin vê ramanê teslîm bigirin û îradeya azad a gelan bixin bin esaretê. Lê belê, tevî şertên giran ên tecrîdê yên ku 26 sal in li Îmraliyê didomin, berxwedana Birêz Ocalan, weke rawestiyeke ramanî û siyasî ya di asta dîrokî de, armanca komployê pûç kiriye.”
‘Em denge aştiyê mezin bikin’
Emîn Kûtas destnîşan kir ku hewldanên Modernîteya Kapîtalîst ên ji bo vemirandina agirê azadiyê yê ku Brez Ocalan pêxistibû, pûç derketin û wiha domand: “Berovajî vê, ev agir roj bi roj zêdetir geş bûye û îro bûye meşaleyek ku rêya azadiyê ya gelê Kurd û hemû gelên Rojhilata Navîn ronî dike. Niha erkê ku dikeve ser milê me, ew e ku em vê meşaleyê dest bi dest bigerînin, li çar aliyên cîhanê belav bikin û rêya azadiya Brez Ocalan vekin. Azadiya Brez Ocalan, ji bo aştiya gelan û paşeroja demokratîk gaveke herî berbiçav e. Dema ku em li dijî komployê dengê xwe bilind dikin, bila em dengê azadî û aştiyê jî bi hev re mezin bikin.”
Daxuyanî, bi dirûşmeya “Bijî serok apo” bi dawî bû.
