Birayê Sirri Sureyya Onder Alî Onder anî ziman ku aliyê dil ê rastê yê Sirri dixebite û got: “Ew pêvajo wê dirêj bajo.”
Endamê şandeya Partiya Wekhevî û Demokrasiyê ya Gelan (DEM Partî) Sirri Sureyya Onder ku damara mezin (aort) a dilê wî çiriya 5 roj in li Nexweşxaneya Florence Nightingale ya navçeya Şîşlî ya Stenbolê di beşa lênehîrîna awarte de tê tedawîkirin. Malbata Onder, şandeya DEM Partiyê jî li nexweşxaneyê rewşê ji nêzik ve dişopînin û serdanên nexweşxaneyê qebûl dikin. Birayê Sirri Sureyya Onder Alî Onder ji Ajansa Welat re axivî û bi lêv kir ku aliyê dil ê rastê yê birayê wî dixebite. Alî Onder anî ziman ku gelek kes hatine nexweşxaneyê serdana wan kirine û got: “Ji her aliyî ve hatin nexweşxaneyê serdan kirin. Em ji bo wê pir mahcûb in. Bijîşkên ku ameliyat kirin jî mucîzeyek kirin. Rewşa wî ya stabil berdewam dike. Lê ew stabil li gor bijîşkan baş e. Heviya me jî ew e ku baş bibe. Helbet rewşa xeternek jî berdewam dike. Lê rewş niha ne xirab e. Heke birayê min baş bibe wê bi xêra duayan gel baş bibe. Ji bo wê em ji hemû kesan re spas dikin. Ji bo şiyarkirinê rojeke diyarkirî tuneye. Li gor rewşê û başbûnê wê şiyar bibe. Roja anîn nexweşxaneyê aliyê dil ê rastê nedixebitî. Duh di seatên nîvro de ji me gotin ku aliyê dil ê rastê jî lêdan heye ew yek jî ji bo me geşedaneke baş e.”
