Maça Amedspor û Bodrumsporê dê saet di 20.00an de li Bodrûmê bê lîstin. Alîgirên Amedsporê yên ji Îzmîr û Stenbolê çûn Bodrûmê di rê de sirûda “Dîren Ha Diyarbekir Dîren” gotin û ji bo piştevaniya Leyla Zanayê strana “Leyla” gotin û wêneyê “Leyla Zana rûmeta me ye” hilgirtin.
Maçên Lîga 1emîn a Trendyolê ya Federasyona Futbula Tirkiyeyê (TFF) berdewam dikin. Hefteya 18emîn dê îro bi maça Amedsporê û Bodrumsporê bi dawî bibe. Amedspor li deplasmanê ye. Maça Amedsporê û Bodrumsporê dê saet di 20:00an de li Stada Bodrumê bê lîstin. Gelek alîgirên Amedsporê jî ji bajarên cuda ji bo maçê çûne navçeya Bodrumê ya Mûglayê.
Komên alîgiran ên Barîkat Ege, Mor Barîkat û Dîrenîş Îstanbûl jî ji Îzmîr, Manîsa, Mûgla, Aydin û Stenbolê berê xwe dan Bodrûmê. Alîgirên Barîkatê di rê de ji bo piştevaniya siyasetmedara Kurd Leyla Zana bi erbaneyan strana “Leyla” ku hunermend Diyar dibêje û sirûda “Dîren Ha Diyarbekir Dîren” gotin. Koma alîgiran a Dîrenîşê jî bi pankartên ku li ser “Leyla Zana rûmeta me ye” , “Em tên” û “Serkeftin herî zêde ji we tê” diçin maçê. Alîgirên ku bi rêya telefonê em bi wan re axivîn gelek bicoş bûn û diyar kirin ku dê di maçê de ji bo piştevaniya Leyla Zana dirûşmên piştevaniyê berz bikin û maskeyên Leyla Zana bidin ber rûyê xwe.
