Amed – Şêniyên Amedê anîn ziman ku pêwist e zagona rêveberiya herêmî bê guhertin û xwestin şarêdar walî, qeymeqam û hemû rêveberên navçe û bajaran ji aliyê gel ve bên hilbijartin.
Hikûmeta Tirkiyeyê ji 2016an heta niha qeyûm tayînî şaredariyên bajarên Kurdan dike. Di 9 salên dawî de 3 carin qeyûm tayînî şaredariyên bajar û navçeyên Kurdistanê dikin. Hikûmeta desthilatê bi tayînkirina qeyûman destûr nade ku Kurd xwe û bajarên xwe bi rêve bibin. Tevî ku gelê Kurd di hilbijartinan de şaredariyên bajar û navçeyên xwe bi dengekî zêde bi dest dixin jî dîsa hikûmeta AKP-MHPê qeyûm tayîn dike û şaredariyan desteser dike. Bi tayînkirina qeyûm êdî her tişt dikeve kontrola walî û qeymeqamên dewletê û vîna gel tê binpêkirin. Gelê Amedê ji Ajansa Welat (AW) re axivîn û diyar kirin ku divê zagona rêveberiya herêmî ji nûve bê sazkirin.
‘Divê rê li pêşiya qeyûm bigirin’
Welatî Veysî Saydam diyar kir ku divê rêveberên bajar ji bo berjewemendiyên gel bixebitê û got: “Ez ji Hevşarêdarên Bajarê Amedê razî me. Lê divê êdî qeyûm tune be. Qeyûm ji gel dûr e. Dema qeyûm tune be şarêdarî ji bo gel kar dike. Ji ber ku walî û qeymeqam girêdayî dewletê ne, xizmeta gel nakin.”
‘Em dixwazin gel walî û qeymeqam hilbijêre’
Welatî Mûhemmed Menteş jî da zanîn ku ji ber qeyûm tayinî şarêdariyan dikin şarêdarî nikarin bixebitin û got: “Mirov nikare ji walî û qeymeqam tiştekî bixwaze. Ji ber ku ew gel nas nakin. Em kê hilbijêrin divê ew xizmeta bajarê me bike. Ji ber vê yekê em naxwazin walî û qeymeqam bajarên me bi rêve bibe. Em dixwazin gel walî û qeymeqaman jî hilbijêre.”
‘Gel kî hilbijartibe divê ew bixebite’
Welatî Mustafa Yilmaz jî diyar kir ku qeyûm ji bo berjewemendiya gel xetereye û wiha axivî: “Divê walî û qeymeqam jî bên hilbijartin. Divê gel wan hilbijêre. Gel kê hilbejerê divê ev bixebite. Lê em dibînin gel şarêdaran hildibijêre, lê qeyûm tayin dikin.”
Welatî Abdulkadîr Çetîn jî bibîrxist ku pêwiste rêveberên herêmî ji bo daxwaza gel amade be û xwest ku kêmasiyên bajar bê çareserkirin. Abdulkadîr Çetîn anî ziman ku divê rêveberên herêmî ji bo gel hebin.
Welatî Abdullah Ozbay jî diyar kir ku ew ji şarêdarên xwe keyfxweş in û wiha got: “Em ji şarêdarên xwe kêfxweş in. Em şaredariyan hildibijêrin. Lê divê qeyûm tayîn nekin. ”
Mehmet Ogûz jî xwest ku rêveberên herêmî her dem ji bo gel bixebitê û wiha got: “Gelek kêmasiyê bajar hene. Walî û qeymeqam ne welatiyên bajêr in. Ew jo bo gel tu karî nakin. Divê em tevahiya rêveberên herêmî hilbejerin.”
